ប្រទេសប៉ាគីស្ថាន៖ កងកម្លាំងសន្តិសុខប៉ាគីស្ថានបានសម្លាប់ភេរវករ៦នាក់ក្នុងប្រតិបត្តិការដែលផ្អែកលើព័ត៌មានស៊ើបការសម្ងាត់នៅខេត្តប៉ាឡូជីស្ថាន ភាគនិរតីប្រទេសប៉ាគីស្ថាន នេះបើតាមការលើកឡើងរបស់យោធាកាលពីថ្ងៃសុក្រ។
អង្គភាពទំនាក់ទំនងសាធារណៈអន្តរសេវា (ISPR) ដែលជាស្ថាប័នផ្សព្វផ្សាយព័ត៌មានរបស់យោធាប៉ាគីស្ថានបានឲ្យដឹងក្នុងសេចក្តីថ្លែងការណ៍ថា ប្រតិបត្តិការនោះគឺត្រូវបានធ្វើឡើងនៅក្នុងស្រុកផានហ្កួរ នៅពេលយប់ចន្លោះពីថ្ងៃទី០៣ និងទី០៤ ខែមិថុនា បន្ទាប់ពីមានរបាយការណ៍ពីវត្តមានរបស់ក្រុមភេរវករនៅក្នុងតំបន់។
យោងតាមសេចក្តីថ្លែងការណ៍បានឲ្យដឹងថា កម្លាំងសន្តិសុខបានប្រយុទ្ធគ្នាយ៉ាងមានប្រសិទ្ធិភាពនៅទីតាំងលាក់ខ្លួនរបស់ក្រុមសកម្មប្រយុទ្ធអំឡុងពេលប្រតិបត្តិការ បង្កឱ្យមានការបាញ់ប្រហារគ្នាយ៉ាងខ្លាំងដែលបណ្តាលឱ្យសកម្មប្រយុទ្ធ៦នាក់ស្លាប់។
អាវុធ គ្រាប់រំសេវ គ្រឿងផ្ទុះជាច្រើន និងរថយន្តមួយគ្រឿង ត្រូវបានរឹបអូសពីក្រុមសកម្មប្រយុទ្ធដែលស្លាប់។ ក្រុមទាំងនេះត្រូវបានអះអាងថា បានចូលរួមយ៉ាងសកម្មក្នុងសកម្មភាពភេរវកម្មជាច្រើននៅក្នុងតំបន់នោះ៕
ប្រភព Xinhua ចុះផ្សាយឡើងវិញថ្ងៃទី០៨ ខែមិថុនា ឆ្នាំ២០២៦
