ចាប់តាំងពីការស្លាប់របស់លោក George Floyd មក បណ្ដាញសង្គម Facebook បានអនុញ្ញាតឲ្យមានការបង្ហោះអំពីការលើកតម្កើងអំពើហិង្សារបស់លោក ដូណាល់ ត្រាំ លើបណ្ដាញរបស់ខ្លួន ដោយលោក Mark Zuckerberg បានសម្រេចចិត្តមិនមានសកម្មភាពអ្វីទាំងអស់លើការបង្ហោះបែបនេះ ដោយលោកបាននិយាយថាវាមិនបានល្មើសនឹងបទបញ្ជាក្រុមហ៊ុននោះទេ។
ចំណែកឯ Twitter វិញ បានដាក់ការសម្គាល់លើការបង្ហោះរបស់លោក ដូណាល់ ត្រាំ ថាជា “ការលើកតម្កើងអំពើហិង្សា”។
សកម្មភាពរបស់លោក Mark Zuckerberg បានធ្វើឲ្យមានការរិះគន់ប្រឆាំងទាំងពីអ្នកខាងក្នុងក្រុមហ៊ុន Facebook និងអ្នកខាងក្រៅ។ ក្រុមសកម្មជនសិទ្ធិមនុស្ស និងបណ្ដាអង្គភាពជុំវិញពិភពលោកបានសម្ដែងការរិះគន់ជាខ្លាំង និងបានទាមទារឲ្យបណ្ដាញសង្គមយក្សនេះធ្វើការផ្លាស់ប្ដូរច្បាប់របស់ខ្លួន។
មិនតែប៉ុណ្ណោះមានយុទ្ធនាការមួយត្រូវបានគេបង្កើតឡើងឈ្មោះថា #StopHateForProfit ដែលទទូចឲ្យក្រុមហ៊ុននានាធ្វើពហិការចំពោះ Facebook តាមរយៈការឈប់ប្រើសេវាផ្សាយពាណិជ្ជកម្មរបស់បណ្ដាញសង្គមនេះនៅខែកក្កដា។ យុទ្ធនាការនេះបង្កើតឡើងដោយអង្គការ Color of Change, ADL និង NAACP ដែលចាប់ផ្ដើមកាលពីថ្ងៃទី ១៧ ខែមិថុនា ជាមួយគោលបំណងសុំឲ្យ Facebook ជួយទប់ស្កាត់ការចែកចាយមាតិកាពោរពេញដោយការស្អប់ ហិង្សា និងការរើសអើងពូជសាសន៍។
នៅថ្ងៃទី ២៥ ខែមិថុនា Verizon ដែលជាក្រុមហ៊ុនទូរគមនាគមន៍ធំបំផុតមួយក្នុងលោកបានប្រកាសចូលរួមយុទ្ធនាការនេះ ដែលពួកគេបានអះអាងថានឹងបញ្ឈប់ការទិញផ្ទាំងផ្សព្វផ្សាយលើ Facebook រហូតដល់ពេលដែល Facebook រកឃើញដំណោះស្រាយដែលអាចទទួលយកបានមួយ។ គួរដឹងថាមកទល់ពេលនេះមានក្រុមហ៊ុនជិត ១០០ហើយ ដែលចូលរួមយុទ្ធនាការនេះ ដែលរួមមាន Ben & Jerry’s, The North Face, REI, Patagonia និង Eddie Bauer ជាដើម៕
