អ្នកស្រាវជ្រាវពីរនាក់របស់ក្រុមហ៊ុន Samsung Display រួមជាមួយដៃគូខាងក្រៅម្នាក់ទៀត ត្រូវបានចាប់ខ្លួនកាលពីចុងសប្ដាហ៍កន្លងទៅ បន្ទាប់ពីព្រះរាជអាជ្ញាកូរ៉េខាងត្បូងបានចោទប្រកាន់ពួកគេពីបទចារកម្ម ដែលផ្ដល់ផលប្រយោជន៍ដល់ក្រុមហ៊ុនចិន និងធ្វើឲ្យក្រុមហ៊ុន Samsung Display រងការខាតបង់រាប់សិបលានដុល្លារ។
អត្តសញ្ញាណរបស់ជនជាប់ចោទខាងលើមិនត្រូវបានបង្ហាញនោះទេ ប៉ុន្តែគេដឹងអ្នកស្រាវជ្រាវរបស់ Samsung Display មានវ័យ ៤៦ឆ្នាំ និង ៣៧ឆ្នាំ។ ចំណែកបុរសម្នាក់ទៀតគឺជាអ្នកចាត់ការនៃក្រុមហ៊ុនផលិតបន្ទះអេក្រង់ ដែល Samsung ធ្លាប់សហការជាមួយកាលពីមុន។
ការចុះផ្សាយរបស់សារព័ត៌មានកូរ៉េខាងត្បូងបានឲ្យដឹងថា ករណីខាងលើនេះគឺមានពាក់ព័ន្ធនឹងវិធីសាស្ត្រនៃការផលិតអេក្រង់ OLED របស់ Samsung ដែលប្រើប្រាស់នូវវិធីសាស្ត្រ Inkjet Printing ដែលគេបានចាត់ទុកវាថាជាអនាគតនៃការផលិតអេក្រង់ OLED ដោយសារតែចំណាយលើការផលិតតិចជាងវិធីសាស្ត្រ WOLED ដែលក្រុមហ៊ុនភាគច្រើនប្រើប្រាស់សព្វថ្ងៃនេះ៕
