ក្រុមហ៊ុន Microsoft បានបន្ថែមនូវមុខងារ Background Blur ទៅក្នុងការជជែក Video Call នៅលើកម្មវិធី Skype កាលពីពេលថ្មីៗនេះ។ អនុញ្ញាតឲ្យអ្នកអាចធ្វើឲ្យផ្ទៃខាងក្រោយមានសភាពព្រាល ជាផ្នែកជួយបិទបាំងនូវភាពរញ៉េរញ៉ៃមួយចំនួនក្នុងការិយាល័យឬគេហដ្ឋាន។
ជារួមគឺមានប្រយោជន៍ខ្លាំងបំផុតសម្រាប់អ្នកចង់បិទបាំងភាពខ្មាសអៀនឬរបស់របរឥតសណ្តាប់ធ្នាប់មួយចំនួននៅទីតាំងឬក្នុងកាលៈទេសៈចាំបាច់ណាមួយ។ បច្ចុប្បន្នដាក់ឲ្យដំណើរការតែលើកម្មវិធី Skype ជំនាន់ក្រោយប្រភេទ Desktop ប៉ុន្តែមិនមានការបង្ហើបច្បាស់លាស់ថាជំនាន់ Mobile អាចប្រើប្រាស់មុខងារនេះបានពេលណានោះទេ។
ដំណើរការរបស់វាត្រូវបាន Microsoft ប្រាប់ថាឆ្លងកាត់ការត្រួតពិនិត្យដោយបច្ចេកវិទ្យា AI (Artificial Intelligence) ដើម្បីបង្កើតភាពព្រាលគ្រប់បរិវេណជុំវិញ ខណៈវាក៏អាចពិនិត្យដឹងពីផ្នែកដៃនិងសក់ ដើម្បីឲ្យប្រាកដថាមិនបានបង្កើតភាពព្រាលខុសប្រក្រតីត្រង់ផ្នែកណាមួយក្នុងអំឡុង Video Call។
