ឥណ្ឌូណេស៊ី ពិចារណា​កំណត់​ម៉ោង​លេង​ហ្គេម​អន​ឡាញ PUBG

0

​នៅ​ឥណ្ឌូណេស៊ី ការជជែក​ពិភាក្សា​លើ​បញ្ហា​វីដេអូ​ហ្គេម និង​ផលប៉ះពាល់​របស់​វា​កំពុង​បន្ត​ធ្វើឡើង ខណៈ​ក្រសួង​ព័ត៌មាន​និង​ទូរគមនាគមន៍​ប្រទេស​នេះ ចង់​ឲ្យ​មានការ​រឹត​ត្បឹ​ត​លើ​ម៉ោង​លេង​ហ្គេម​អន​ឡាញ PUBG ដ៏​ពេញនិយម​។ បំណង​នេះ គឺធ្វើឡើង​ក្រោយពី​អង្គការ​អ្នក​កាន់សាសនា​ឥស្លាម​ស្នើ​ឲ្យ​ចេញ​ច្បាប់​ហាមឃាត់​ហ្គេម​ប្រភេទ​នេះ ដែល​ខ្លួន​សង្ស័យថា​ជាប់​ពាក់ព័ន្ធ​នឹង​បាញ់សម្លាប់​រង្គាល​កាលពី​ថ្មីៗ​នេះ នៅ​នូ​វែ​ល​សេ​ឡង់​។​

​ថ្លែង​នៅ​ថ្ងៃទី ២៥ ខែមីនា មន្ត្រីជាន់ខ្ពស់​នៃ​ក្រសួង​ព័ត៌មាន​ឥណ្ឌូណេស៊ី​ទទួលបន្ទុក​ក​ម្ម​វិធី​ទូរ​សព្ទ លោក  Samuel Pangerapan គូសបញ្ជាក់ថា ក្រសួង​មានបំណង​ស្វែងរក​មធ្យោបាយ ដើម្បី​កំណត់​ពេលវេលា​លេង​ហ្គេម ដែលមាន​ប្រភេទ​ជា​លក្ខណៈ​បាញ់ប្រហារ និង​លេង​តាម​ប្រព័ន្ធ​អន​ឡាញ​។

​យោងតាម​ការចុះផ្សាយរ​បស់​សារព័ត៌មាន The Jarkarta Post  លោក Samuel និយាយទៀតថា ក្រសួង​ព័ត៌មាន​ពុំទាន់​បង្កើត​គម្រោង​ច្បាស់លាស់​ណាមួយ​នៅឡើយ​ទេ ជុំវិញ​ការ​រឹតត្បិត​រយៈពេល​លេង​ហ្គេម PUBG​។ ប៉ុន្តែ​លោក​ថា ក្រសួង​កំពុងធ្វើការ​លើ​រឿងនេះ​។
​បន្ថែម​ពីនេះ លោក Samuel អះអាងថា ការ​រឹតត្បិត​លើ​ម៉ោង​លេង​ហ្គេម​នេះ ប្រសិនបើ​ត្រូវអនុវត្ត​មែន​នោះ វា​មិន​ត្រឹមតែ​អនុវត្ត​លើ​ហ្គេម PUBG មួយ​មុខ​នោះទេ ប៉ុន្តែ​ក៏ត្រូវ​អនុវត្ត​លើ​ហ្គេម​ផ្សេងៗ​ទៀត​នៅលើ​ទីផ្សារ​ផងដែរ​។ លោក​លើកឡើង​ទៀតថា ក្រសួង​បាន​បង្កើត​គោលការណ៍​ណែនាំ​ជា​ផ្លូវការ​ស្តីពី​ការវាយតម្លៃ​វីដេអូ​ហ្គេម ដែល​បង្កើតឡើង​ក្នុង​គោលដៅ​ចាត់ថ្នាក់​ហ្គេម​ឲ្យ​សម​នឹង​អាយុ​របស់​អ្នកលេង​។
​សូមបញ្ជាក់ថា សេចក្តីថ្លែងការណ៍​រប​ស់​ក្រសួង​ព័ត៌មាន​ឥណ្ឌូណេស៊ី​នេះ គឺធ្វើឡើង​ក្រោយពី​ក្រុមប្រឹក្សា Ulema ឥណ្ឌូណេស៊ី បានស្នើ​ឲ្យ​ចេញ​ច្បាប់​ហាមឃាត់​ហ្គេម PUBG ។ អង្គការ​ឥស្លាម ក៏បាន​ប្រកាស​ពី​កង្វល់​របស់ខ្លួន ក្រោយ​ហ្គេម​បាញ់ប្រហារ​ប្រភេទ​នេះ​បាន​ជាប់​ពាក់ព័ន្ធ​ជាមួយ​មនុស្ស​ដែល​ចូលរួម​ក្នុង​ការបាញ់​រង្គាល​កាលពី​ថ្មីៗ​នេះ នៅ​វិហារ​ឥស្លាម​ចំនួន​ពីរ​ក្នុង​ទីក្រុង Christchurch នៃ​ប្រទេស​នូ​វែ​ល​សេ​ឡង់​។ ក្នុង​ហេតុការណ៍​នេះ មនុស្ស​ប្រមាណ​៥០​នាក់​បាត់​បង់ជីវិត​។

LEAVE A REPLY

Please enter your comment!
Please enter your name here