លោក Alex Stamos ជាបុគ្គលដែលជិតស្និទ្ធជាមួយអ្នកបង្កើត Facebook បានលើកឡើងថា Mark Zuckerberg កាន់តំណែងច្រើននិងមានឥទ្ធិពលខ្លាំងពេកនៅក្នុងរចនាសម្ព័ន្ធ Facebook ដូចនេះថ្នាក់ដឹកនាំក្រុមហ៊ុន គួរតែពិចារណារកអ្នកមកស្នងតំណែងធំជានាយកប្រតិបត្តិជំនួស Mark វិញ។
អតីតប្រធានផ្នែកសុវត្ថិភាពធំជាងគេក្នុង Facebook រូបនេះបានបន្តទៀតថា ប្រការដែលបន្ថយតួនាទីនេះគឺ គោលបំណងចង់ឲ្យ Mark ផ្ដោតលើអ្វីដែលគាត់ចូលចិត្តធ្វើដូចកាលពីមុន។
ប្រសិនបើអនុញ្ញាតឲ្យស្ថាបនិកបណ្ដាញសង្គមដ៏មានប្រជាប្រិយភាពរូបនេះ ដកឃ្លាពីការងារដ៏ច្រើនសម្បើមដូចរាល់ថ្ងៃនេះ អាចជួយឲ្យគាត់ផ្ដោតលើការរៀបចំផលិតផលថ្មីជាស្នាដៃគាត់ផ្ទាល់ និងបង្កើតឲ្យមានវប្បធម៌ថ្មីនៅក្នុងក្រុមហ៊ុនកាន់តែរីកចម្រើន។
បច្ចុប្បន្ននៅមិនទាន់ការប្រជុំសម្រេចថានឹងបន្ថយតំណែងរបស់ Mark Zuckerberg យ៉ាងណានោះទេ ក៏ប៉ុន្តែបេក្ខភាពឈានមុខគេដែលអាចនឹងជំនួសតំណែងបានមានដូចជា លោក Brad Smith ដែលជាបុគ្គលមានឥទ្ធិពលម្នាក់ក្នុងក្រុមហ៊ុន Microsoft ឯណោះវិញ។
បន្ថែមលើនេះទៀត លោក Jason Calacanis អ្នកបណ្ដាក់ទុនលើផ្នែកបច្ចេកវិទ្យាមួយរូប ក៏ធ្លាប់បានលើកឡើងក្នុងបទសម្ភាសន៍ជាមួយសារព័ត៌មាន CNBC ថា សមត្ថភាពដោះស្រាយនឹងវិបត្តិរបស់ Mark គឺអន់ណាស់ ហើយបានបន្ថែមថាដល់វេនដែលអ្នកស្រី Sheryl Sandberg ដែលបច្ចុប្បន្នមានតំណែងជាប្រធានប្រតិបត្តិ ឡើងធ្វើជានាយកប្រតិបត្តិវិញម្ដង។ Facebook បានកើតមានបញ្ហាធំ ក្រោយពីមានការរាយការណ៍ថាក្រុមហ៊ុនស្រាវជ្រាវ Cambridge Analytica អាចចូលមើលទិន្នន័យគណនី Facebook ចំនួន ៥០ លានគណនី មុនការបោះឆ្នោតរើសប្រធានាធិបតីនៅឆ្នាំ ២០១៦។
លោក Jason ដែលជានាយកប្រតិបត្តិនៃ Insider.com និងជាអ្នកបណ្ដាក់ទុនលើសេវាកម្ម Uber បាននិយាយថាទង្វើរបស់ Mark គឺបង្ហាញពីការបរាជ័យលើភាពជាអ្នកដឹកនាំ និងបានលើកសរសើរលោកស្រី Sheryl ថា អាចដោះស្រាយលើបញ្ហាបែបនេះបានល្អជាង Mark៕
![](https://i0.wp.com/cdn.nctc.gov.kh/2019/05/5ce4bb1c3a73d_1558493940_large.jpg?resize=696%2C436&ssl=1)