រាជធានីភ្នំពេញ៖ ជនជាតិស្បែកខ្មៅម្នាក់ ត្រូវបានធនាគារកាណាឌីយ៉ា ឃាត់ខ្លួន និងបានបញ្ជូនឲ្យនគរបាលការិយាល័យអន្តោរប្រវេសន៍ នៃស្នងការដ្ឋាននគរបាលរាជធានីភ្នំពេញ នៅវេលាម៉ោង១១ និង៥០នាទី ថ្ងៃទី២១ មិនា ឆ្នាំ២០១៦ នេះ ក្នុងសង្កាត់ស្រះចក ខណ្ឌដូនពេញ ពីបទលួចបន្លំដកលុយពីធនាគារអស់ចំនួន ៤ម៉ឺន៨ពាន់ដុល្លារ។
យោងតាមសម្តីភ្នាក់ងាររបស់ធនាគារកាណាឌីយ៉ា បានប្រាប់ឲ្យដឹងថា ជនសង្ស័យឈ្មោះ Kanzi Francis Olivier ភេទប្រុស អាយុ៣៨ឆ្នាំ ជនជាតិប៊ែលហ្ស៊ិក បានលួចបន្លំដកប្រាក់អស់ចំនួន ៤ម៉ឺន ៨ពាន់ដុល្លារ ពីសាខាធនាគារស្តាតចាស់ កាលពីថ្ងៃសុក្រ ទី១៨ ខែមិនា ឆ្នាំ២០១៦ កន្លងទៅ លុះនៅថ្ងៃកើតហេតុនេះ ជនសង្ស័យបានមកសាខាធនាគារទួលគោកម្តងទៀត ដើម្បីដកយកប្រាប់ចំនួន ៩ម៉ឺនដុល្លារទៀត តែត្រូវខាងធនាគារកំណត់មុខសញ្ញាសង្ស័យ ក៏តំរូវឲ្យបុរសរូបនេះទៅដកប្រាក់ដែលខ្លួនចង់បាននោះ នៅស្នាក់កណ្តាលប្រចាំរាជធានីភ្នំពេញ ដែលស្ថិតនៅតាមមហាវិថីព្រះមុន្នីវង្ស សង្កាត់ស្រះចក ខណ្ឌដូនពេញ ខណៈនោះដោយខាងធនាគារ បានរកឃើញថា ជនសង្ស័យបានប្រើប្រាស់លិខិតស្នាមក្លែងក្លាយ និងបានប្រើឈ្មោះជាច្រើន (មិនច្បាស់លាស់) ខាងធនាគារ ក៏បានឲ្យជនសង្ស័យទៅយកឯកសារនៅសាខាធនាគារទួលគោក ស្រាប់តែជនសង្ស័យ បានបើកទ្វាររថយន្ត បំរុងរត់គេចខ្លួន តែត្រូវសន្តិសុខធនាគារ ជិះម៉ូតូដេញតាម ទើបចាប់បានបុរសខ្មៅរូបនេះ បញ្ជូនទៅឲ្យប៉ុស្តិ៍នគរបាលរដ្ឋបាលមិត្តភាពតែម្តង។
បច្ចុប្បន្នជនសង្ស័យ ត្រូវសមត្ថកិច្ចបញ្ជូនបន្តទៅកាន់ការិយាល័យនគរបាលអន្តោរប្រវេសន៍ នៃស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរ និងកសាងសំណុំរឿងចាត់ការទៅតាមនីតិវិធី៕
