ពាក្យថា Open Source សំដៅទៅលើអ្វីមួយដែលមនុស្សអាចធ្វើការកែប្រែនិងចែករំលែក ព្រោះទម្រង់របស់វាអាចអនុញ្ញាតឲ្យអ្នកចូលទៅប្រើប្រាស់ជាសាធារណៈ។ ពាក្យនេះសោតត្រូវគេនិយមយកទៅភ្ជាប់ជាមួយពាក្យ Software ហើយក៏មានការងឿងឆ្ងល់ ថាតើ Open Source Software មានអត្ថន័យដូចម្តេច?
និយាយឲ្យងាយយល់វាជាប្រភេទកម្មវិធីលើកុំព្យូទ័រ ដែលអ្នកអភិវឌ្ឍ (Developer) បានបើកចំហប្រភពកូដ (Source Code) ឲ្យទៅអ្នករាល់គ្នាអាចធ្វើការត្រួតពិនិត្យ កែប្រែ និងច្នៃឲ្យប្រសើរឡើង។ កូដនេះបង្កើតដោយអ្នកសរសេរកម្មវិធីកុំព្យូទ័រ ហើយអ្នកប្រើប្រាស់ក៏អាចផ្លាស់ប្តូរទៅតាមទម្រង់នៃដំណើរការដែលខ្លួនចង់បានឬកែចន្លោះប្រហោងបើគិតថាដំណើរការពុំប្រក្រតី។ ឧទាហរណ៍ដូចជាកម្មវិធី LibreOffice និង GNU Imgae Manipulation។
ខុសគ្នាទៅនឹង Closed Source ឬ Proprietary Software ដោយប្រភពកូដនេះមានតែក្រុមការងារ ស្ថាប័ន ឬបុគ្គលអ្នកបង្កើតតែប៉ុណ្ណោះ ដែលអាចចូលកែប្រែបាន។ ជាញឹកញយអ្នកប្រើប្រាស់ត្រូវបានទាមទារឲ្យយល់ព្រមលើអាជ្ញាប័ណ្ណដំណើរការកម្មវិធីនោះ ឧទាហរណ៍ដូចជាកម្មវិធី Microsoft Office និង Adobe Photoshop៕
