ថ្ងៃទី 15 ខែឧសភានេះគឺជាថ្ងៃចុងក្រោយក្នុងការទទួលយកនូវការអាប់ដេតថ្មីទៅលើគោលការណ៍ឯកជនភាព (Privacy Policy) នៅក្នុងកម្មវិធី WhatsApp ។ ក្រុមហ៊ុននេះបានជូនដំណឹងទៅកាន់អ្នកប្រើប្រាស់ជាច្រើនរបស់ខ្លួនអំពីគោលការណ៍ឯកជនថ្មីនេះតាំងពីខែមករានេះម្ល៉េះ។
ក្នុងការប្រកាសជាផ្លូវការនោះ អ្នកប្រើប្រាស់ទាំងអស់របស់កម្មវិធី WhatsApp ត្រូវទទួលយកនូវការអាប់ដេតទៅលើគោលការណ៍ឯកជន (Privacy Policies) នេះនៅត្រឹមថ្ងៃទី 8 ខែកុម្ភៈប៉ុណ្ណោះ ប៉ុន្តែដោយសារតែវាមានបញ្ហាប្រឆាំងជាច្រើនកើតឡើងចំពោះគោលការណ៍នេះ ក្រុមហ៊ុនក៏កំណត់ពន្យារពេលថ្ងៃផុតកំណត់ដល់ថ្ងៃទី 15 ខែឧសភាសម្រាប់គោលការណ៍ថ្មីនេះ។
គួរបញ្ជាក់ផងដែរថា កម្មវិធី WhatsApp គឺជាផ្នែកមួយរបស់ក្រុមហ៊ុន Facebook តាំងពីឆ្នាំ 2014 ដែលនេះមានន័យថា WhatsApp គឺគ្រប់គ្រងដោយ Facebook ។ ចាប់តាំងពីពេលនោះមក Facebook និង WhatsApp អាចចែករំលែកគ្នាទៅវិញទៅមកដើម្បីពង្រឹងទៅលើសេវាកម្ម និងស្ថិតិរបស់ពួកគេកាន់តែប្រសើរឡើង។ សម្រាប់អ្នកដែលមិនទទួលយកនូវគោលការណ៍ឯកជនថ្មីរបស់ WhatsApp នោះ ក្រុមហ៊ុន Facebook នឹងធ្វើការបិទនូវមុខងារមួយចំនួននៅលើគណនីរបស់ពួកគេដូចជា៖
- អ្នកមិនអាចចូលទៅកាន់បញ្ជីឆាតរបស់អ្នក
- អ្នកមិនអាចទទួលបាននូវការខល ឬសាររំលឹក (Notifications)
- WhatsApp នឹងបញ្ឈប់នូវការផ្ទេរសារ និងខលទៅកាន់ស្មាតហ្វូនរបស់អ្នក
ក្រៅពីនេះ WhatsApp បញ្ជាក់ថា ប្រសិនបើអ្នកមិនមានសកម្មភាពអ្វីនោះទេក្នុងរយៈពេល 120 ថ្ងៃនោះ គណនីរបស់អ្នកនឹងត្រូវបានលុបចោលដោយស្វ័យប្រវត្តិផងដែរ៕
ប្រភព៖ https://gbhackers.com/facebook-limit-your-whatsapp-feature/
