ក្រុមហ៊ុនកម្មវិធី Rubrik បានបង្ហើបប្រាប់កាលពីខែមុនថា ម៉ាស៊ីនមេមួយក្នុងចំណោមម៉ាស៊ីនមេជាច្រើនរបស់ក្រុមហ៊ុនដែលបង្ហោះ Log Files ត្រូវបានបំពាន និងបណ្តាលឱ្យក្រុមហ៊ុនត្រូវបង្វិល ឬផ្លាស់ប្តូរលេខផ្ទៀងផ្ទាត់ភាពត្រឹមត្រូវដែលត្រូវបានលាតត្រដាង។
ក្រុមហ៊ុនបានបញ្ជាក់ប្រាប់ BleepingComputer ថា ការបំពាននេះមិនមែនជាឧប្បត្តិហេតុនៃមេរោគចាប់ជម្រិតទេ និងថាក្រុមហ៊ុនមិនបានទទួលព័ត៌មានអ្វីពីហេគឃ័រទេ។ ក្រុមហ៊ុន Rubrik គឺជាក្រុមហ៊ុនសន្តិសុខសាយប័រ ដែលមានជំនាញនៅក្នុងការការពារទិន្នន័យ Backup និងស្តារឡើងវិញ ថែមទាំងមានបុគ្គលិកមិនតិចជាង ៣,០០០នាក់នៅក្នុងការិយាល័យចំនួន ២២ នៅទូទាំងសកលលោក។ ក្រុមហ៊ុននេះមានអតិថិជនប្រមាណជា ៦,០០០នាក់នៅទូទាំងពិភពលោករួមមានក្រុមហ៊ុនល្បីៗដូចជា AMD, Adobe, Pepsico, Home Depot, Allstate, Sephora, GSK, Honda, Harvard University និង Trellix។
នៅក្នុងការណែនាំសុវត្ថិភាពដែលបានចេញផ្សាយកាលពីដើមខែកុម្ភៈ និងបានប្រទះឃើញដោយ Kevin Reaumont បានឱ្យដឹងថា ក្រុមហ៊ុន Rubrik ថ្លែងថា ខ្លួនបានរកឃើញសកម្មភាពខុសប្រក្រតីនៅលើម៉ាស៊ីនមេដែលបង្ហោះ Log Files របស់ក្រុមហ៊ុន។ ក្រុមការងារផ្តល់យោបល់ផ្នែកសន្តិសុខរបស់ក្រុមហ៊ុន Rubrik បានបញ្ជាក់ថា នាពេលថ្មីៗនេះ ក្រុមសន្តិសុខព័ត៌មានក្រុមហ៊ុន Rubrik បានរកឃើញសកម្មភាពមិនធម្មតានៅលើម៉ាស៊ីនមេដែលមានផ្ទុក Log Files។ ភ្លាមនោះ ក្រុមហ៊ុនក៏បានកាត់ផ្តាច់ម៉ាស៊ីនមេទៅ Offline ដើម្បីកាត់បន្ថយគ្រោះថ្នាក់។ ការស៊ើបអង្កេតដែលទទួលបានការគាំទ្រពីដៃគូអ្នកកោសល្យវិច្ច័យភាគីទី៣ បានបញ្ជាក់ថា ឧប្បត្តិហេតុនេះកើតឡើងចំពោះម៉ាស៊ីនមេតែមួយគ្រឿង ហើយត្រូវបានកាត់ផ្តាច់ចេញពីម៉ាស៊ីនមេផ្សេងទៀត ថែមទាំងក្រុមហ៊ុនមិនបានរកឃើញករណីលួចចូលប្រើប្រាស់ទិន្នន័យដោយគ្មានអនុញ្ញាតណាមួយនោះទេ បើយោងតាមការធានាពីក្រុមហ៊ុន។
ទោះជាយ៉ាងណា ក្រុមហ៊ុន Rubrik ថ្លែងថា ដោយសារតែ Log Files មួយចំនួនតូច ដែលមានផ្ទុកព័ត៌មានដំណើរការនៅក្នុងម៉ាស៊ីមេដែលត្រូវបានបំពាននោះ បានបង្ខំឱ្យក្រុមហ៊ុនធ្វើការផ្លាស់ប្តូរលេខសម្ងាត់ផ្ទៀងផ្ទាត់ចេញ ដើម្បីជៀសវាងពីបញ្ហាផ្សេងៗ។ ក្រុមហ៊ុនបន្តទៀតថា គ្មានសញ្ញាណាមួយបង្ហាញថាព័ត៌មាននេះត្រូវបានបំពានទេ។ ជាងនេះ ក្រុមហ៊ុន Rubrik បន្ថែមថា ការស៊ើបអង្កេតនេះមិនមានភស្តុតាងថា ហេគឃ័របានលូចចូលប្រើប្រាស់ទិន្នន័យអតិថិជន ឬប្រភពកូដផ្ទៃក្នុងរបស់ពួកគេទេ។ កាលពីមុន ក្រុមហ៊ុន Rubrik បានទទួលរងការបំពាននៅឆ្នាំ២០២៣ បន្ទាប់ពីទិន្នន័យរបស់ក្រុមហ៊ុនត្រូវបានលួច ដែលជាផ្នែកមួយនៃការវាយប្រហារលួចទិន្នន័យ Fortra GoAnywhere និងបានធ្វើឡើងដោយក្រុមចាប់ជម្រិត Clop។
ប្រភពព័ត៌មាន៖ ថ្ងៃទី០៣ ខែមីនា ឆ្នាំ២០២៥
