ការប្រើប្រាស់ប្រតិបត្តិការកុំព្យូទ័រជំនាន់ចុងក្រោយ ឬ Update ប្រព័ន្ធប្រតិបត្តិការឲ្យបានទៀងទាត់ជាវិធីល្អមួយក្នុងការការពារខ្លួនពីការ Hack។
លោក អ៊ូ ផាន់ណារិទ្ធ អ្នកជំនាញផ្នែកប្រព័ន្ធសុវត្ថិភាពនិងជាសាស្រ្តចារ្យផ្នែកព័ត៌មានវិទ្យាបានឲ្យដឹងថា កាលដែលថ្មីៗនេះមានមេរោគដ៏សាហាវមួយបានវាយលុយលើប្រព័ន្ធកុំព្យូទ័រពាសពេញពិភពលោក ដោយសារអ្នកប្រើប្រាស់មួយចំនួនមិនបានគិតពង្រឹងផ្នែកសុវត្ថិភាពប្រព័ន្ធកុំព្យូទ័រ ដែលនាំឲ្យក្រុម Hacker អាចកំណត់គោលដៅធ្វើការវាយប្រហារយ៉ាងងាយស្រួល។
មេរោគចាប់ជំរិតមួយប្រភេទឈ្មោះ Wannacry ដែលកំពុងរាលដាលជាង ១០០ ប្រទេសលើពិភពលោក បានធ្វើការវាយប្រហារទៅលើចំណុចខ្សោយដែលមាននៅលើប្រព័ន្ធប្រតិបត្តិការ Windows ដោយមិនចាំបាច់តម្រូវឲ្យអ្នកប្រើប្រាស់ចុចលើសារអ្វីឡ់ើយ ប្រសិនបើពួកគេ(Hacker) អាចចូលទៅបានរយៈចំណុចខ្សោយ នោះពួកគេមានលទ្ធភាពវាយប្រហារបានភ្លាមៗលើបណ្ដាញ Network របស់ស្ថាប័ននោះតែម្ដង។ ដូច្នេះ ការការប្រើប្រាស់ប្រតិបត្តិការកុំព្យូទ័រជំនាន់ចុងក្រោយ ឬ Update ប្រព័ន្ធប្រតិបត្តិការនោះឲ្យបានទៀងទាត់ត្រឹមត្រូវជាវិធីល្អបំផុត។
ក្រៅពីការការពារខ្លួនពីមេរោគដែលឆ្លងដោយមិនដឹងខ្លួន សាស្រ្តចារ្យបានបន្ថែមថា បើនិយាយពីការការពារខ្លួន ទាមទារឲ្យអ្នកប្រើប្រាស់ត្រូវUpdate ប្រព័ន្ធប្រតិបត្តិការនោះឲ្យបានទៀងទាត់ត្រឹមត្រូវ ហើយត្រូវ Back Up ឯកសារសំខាន់ៗទុក និងត្រូវប្រើប្រាស់កម្មវិធីកម្ចាត់មេរោគថ្មីៗ (Up-to date) មាន License ថែមទាំងមានសមត្ថភាពអាចចាប់មេរោគថ្មីៗបាន។
បញ្ជាក់ថា មេរោគខាងលើបានបណ្ដាលឲ្យមានកុំព្យូទ័រប្រមាណ ៥៧ ០០០ គ្រឿង ក្នុងបណ្ដាប្រទេស ១៥០ ទទួលរងការវាយប្រហារនូវមេរោគនោះ។ តាមការស្រាវជ្រាវបង្ហាញថា ប្រទេសក្នុងតំបន់អឺរ៉ុបរងផលប៉ះពាល់ខ្ពស់ជាងគេ ដោយរួមបញ្ចូលទាំងកុំព្យូទ័រនៃបណ្ដាក្រុមហ៊ុនធំៗ គួបផ្សំទាំងធនាគារ, មន្ទីរពេទ្យ, និងទីភ្នាក់ងាររាជរដ្ឋាភិបាលមួយចំនួនទៀតផងដែរ៕
