កម្មវិធីវីដេអូកម្សាន្ត TikTok នឹងត្រូវបង់ប្រាក់ពិន័យប្រមាណ ៥,៧ លានដុល្លារ ជូនគណៈកម្មាធិការ FTC របស់សហរដ្ឋអាមេរិក ក្រោយរងការចោទប្រកាន់ពីបទប្រមែប្រមូលព័ត៌មានឯកជនរបស់កុមារ។ TikTok ដែលទើបទិញបាន Musical.ly ជាប្រភេទប្រភេទកម្មវិធីអនុញ្ញាតឲ្យអ្នកប្រើថតវីដេអូខ្លីរបស់ពួកគេចែកចាយកម្សាន្តជាមួយមិត្តភ័ក្ដិ ដោយកន្លងទៅមានការចុច Download ច្រើនជាង ១ ពាន់លានដងលើ iOS និង Android។
FTC បានចោទប្រកាន់ថា ប្រតិបត្តិករកម្មវិធី បានរំលោភលើច្បាប់ការពារសិទ្ធឯកជនតាមអ៊ីនធឺណិតរបស់កុមារ ដោយមិនទទួលការព្រមព្រៀងពីអាណាព្យាបាល មុនប្រមូលព័ត៌មានផ្ទាល់ខ្លួនចេញពីអ្នកប្រើប្រាស់ក្រោមអាយុ ១៣ ឆ្នាំ។ ជាងនេះទៅទៀតកម្មវិធីកម្សាន្តមានប្រភពមកពីប្រទេសចិន ក៏មិនបានលុបព័ត៌មានផ្ទាល់ខ្លួនទាំងនោះ អំឡុងពេលដែលទទួលបានពាក្យបណ្ដឹងពីសំណាក់អាណាព្យាបាល និងកូនៗរបស់ពួកគេ។
ឆ្លើយតបនឹងបញ្ហានេះ TikTok ក៏បញ្ចេញនូវប្រព័ន្ធសុវត្ថិភាពចែកដាច់ដោយឡែកសម្រាប់អ្នកប្រើប្រាស់មានវ័យក្រោម ១៣ ឆ្នាំ ដោយឈប់អនុញ្ញាតឲ្យពួកគេអាចចែកចាយវីដេអូលើ TikTok បន្តទៀត បញ្ឈប់ការបញ្ចេញមតិលើវីដេអូរបស់អ្នកដទៃ ការផ្ញើសារជាមួយអ្នកដទៃជាដើម។
រំឭកផងដែរថា បន្ទាប់ពីក្រុមហ៊ុនយក្ស Bytedance បានទិញយក Muscial.ly កម្មវិធីមានដើមកំណើតនៅទឹកដីសហរដ្ឋអាមេរិកមួយនេះ បានទទួលកំណើនអ្នកប្រើប្រាស់ដល់ ១០០ លាននាក់ប្រចាំខែ ស្របពេល TikTok កម្មវិធីមេ កាលពីខែសីហាឆ្នាំទៅ ត្រូវបានគេរាយការណ៍ថាមានអ្នកប្រើប្រាស់ជាង ៥០០ លាននាក់ជុំវិញពិភពលោក ដោយតួលេខភាគច្រើនសុទ្ធសឹងជាកុមារ។
