ក្រោយពីមានការហាមឃាត់ក្នុងប្រទេសមួយចំនួនរួចមក ពេលនេះក្រុមហ៊ុន Huawei គិតចង់ស្វែងរកយុត្តិធម៌នៅលើទឹកដីសហរដ្ឋអាមេរិក ដែលជាទឹកដីហាមឃាត់ផលិតផល Huawei មុនគេ។ ផ្អែកតាមប្រភពពីរផ្សេងគ្នា ក្រុមហ៊ុនចិនមួយនេះនឹងប្រកាសនៅត្រឹមចុងសប្ដាហ៍នេះ ថាខ្លួននឹងឡើងតុលាការជាមួយរដ្ឋាភិបាលសហរដ្ឋអាមេរិក។
ពាក្យបណ្ដឹងនឹងដាក់ជូននៅសាលាដំបូងនៃភាគខាងកើតរដ្ឋ Texas ដែលជាទីតាំងទីស្នាក់ការរបស់ Huawei។ ពាក្យបណ្ដឹងនេះនឹងនិយាយអំពីរដ្ឋាភិបាលសហរដ្ឋអាមេរិកហាមឃាត់ការប្រើប្រាស់ឧបករណ៍របស់ Huawei សម្រាប់រចនាសម្ព័ន្ធ 5G និងហាមមិនឲ្យមន្ត្រីសហរដ្ឋអាមេរិកប្រើប្រាស់ស្មាតហ្វូន Huawei។
គួរដឹងថាសហរដ្ឋអាមេរិកបានបន្តលើកឡើងថា Huawei ប្រហែលជាបានផ្ដល់ទ្វារក្រោយឲ្យរដ្ឋាភិបាលចិន។ ប៉ុន្តែដោយសារតែគ្មានភស្តុតាងជាដុំកំភួន Huawei បាននិយាយថារដ្ឋាភិបាលអាមេរិកគ្មានសិទ្ធក្នុងឃាត់មិនឲ្យប្រើប្រាស់ឧបករណ៍ Huawei ដោយគ្មានការកាត់ក្ដីនោះទេ៕
