និយាយពីល្បឿនរបស់អ៊ីនធឺណិត 5G នេះគឺមានភាពខុសគ្នាបន្តិចបន្តួចសម្រាប់ការប្រើប្រាស់នីមួយៗ ប៉ុន្តែរំពឹងថានឹងអាចមានល្បឿនចន្លោះពី 10 Mbps ដល់ 10 Gbps។ ល្បឿនប៉ុណ្ណេះនឹងធ្វើឲ្យការប្រើប្រាស់អ៊ីនធឺណិតលើទូរសព្ទដូចជាទស្សនាវីដេអូកម្រិត 4K, 8K ឬ វីដេអូ ៣៦០ ដឺក្រេ ប្រព្រឹត្តទៅយ៉ាងរលូន។
គួរដឹងថាការប្រើប្រាស់ 5G ជាលក្ខណៈផ្លូវការ អាចចាប់ផ្ដើមនៅព្រឹត្តិការណ៍អូឡាំពិករដូវក្ដៅ ដែលធ្វើឡើងនៅឆ្នាំ ២០២០ នៅប្រទេសជប៉ុន។ ស្របពេលគ្នានេះដែរនៅឆ្នាំ ២០២០ ប្រព័ន្ធ 5G ក៏នឹងចាប់ផ្ដើមដាក់ឲ្យប្រើប្រាស់ជាបណ្ដើរនៅប្រទេសកូរ៉េខាងត្បូង និង ប្រទេសចិនផងដែរ។
សម្រាប់ក្រុមហ៊ុនទូរគមនាគមន៍ធំៗចំនួន ៤ របស់អាមេរិករួមមាន Verizon, AT&T, T-Mobile និង Sprint បានចាប់ផ្ដើមធ្វើតេស្ត និង សិក្សាពីសមត្ថភាពរបស់ប្រព័ន្ធអ៊ីនធឺណិតជំនាន់ទី ៥ នេះ ប៉ុន្តែនឹងមិនអាចសម្រេចដាក់ឲ្យប្រើប្រាស់បានមុនឆ្នាំ ២០២០ ឡើយ។
ក្រឡេកទៅប្រទេសក្បែរខាងរបស់កម្ពុជា គឺប្រទេសថៃ កាលពីថ្ងៃទី៦ មិថុនា ២០១៨ លោក Somkid Jatusripitak ឧបនាយករដ្ឋមន្ត្រីថៃ បានបង្ហាញអំពីគម្រោងដាក់ដំណើរការប្រព័ន្ធ 5G នៅឆ្នាំ ២០២០ ខាងមុខនេះ៕
