ក្បាលម៉ាស៊ីន ចារកម្ម៤ធំ ក្នុងបណ្តាញ ស៊ើបយកការណ៍ សម្ងាត់របស់សហរដ្ឋអាមេរិក

0

រដ្ឋាភិបាលអាមេរិក មានក្នុងដៃ នូវស្ថាប័នចារកម្មថ្នាក់សហព័ន្ធ ដែលស្ថាប័នទាំងនេះ មិនត្រឹមតែមានមុខងារស៊ើបយកការណ៍សម្ងាត់ សម្រាប់សេតវិមាន មន្ទីរបញ្ចកោណប៉ុណ្ណោះ តែពួកនេះ ថែមទាំងមានតួនាទី ធ្វើការបម្រើឲ្យក្រសួងការបរទេស ក្រសួងពាណិជ្ជកម្ម ធនាគារជាតិ រួមទាំង​ក្រសួងថាមពល ល.ល ដែលសរុបទៅទាំងអស់ មានប្រមាណ ១៥អង្កការចារកម្ម បូកសរុប​ទៅជាសហគមន៍ស៊ើបយកការណ៍សម្ងាត់ ដែលអង្គការទាំងនេះ ត្រូវបានស្ថិតនៅក្រោម ការដឹកនាំ ចាត់ចែង​ដោយនាយកស៊ីអាយអេ (Director Of Central Intelligence DCI) ដែលក្នុងចំណោម១៥អង្គការចារកម្មនេះ មានស្ថាប័ន ៤ដ៏សំខាន់បំផុតនោះគឺ ៖

CIA (Central Intelligence Agency) អង្គការនេះចាប់កកើតឡើងនៅឆ្នាំ១៩៤៧ មានបញ្ជាការដ្ឋានដាក់នៅ Langley ស្ថិតនៅ Washington មានមន្ត្រីបុគ្គលិកបម្រើការ​អោយអង្កការនេះ ពី ១៦ ០០០ ទៅដល់ ២០ ០០០នាក់ រួមមានទាំងពលរដ្ឋសញ្ជាតិអាមេរិក និងជនបរទេស ។ CIA ត្រូវបានមតិសាធារណជនស្គាល់ច្បាស់ ដោយឆ្លងតាមរយៈ សកម្មភាព របស់អង្កការនេះ ក្នុងការធ្វើវិទ្ធង្សនាប្រឆាំង និងប្រទេសគុយបា អ៊ឺរ៉ុបខាងកើត ពួកប្រទេសអាមេរិកឡាទីន និងលើពិភពលោកទាំងមូល ។ ភារកិច្ចចម្បងរបស់ CIA គឺការរៀបចំចាត់តាំងសកម្មភាព លើទីតាំងជាក់ស្តែងនីមួយៗដោយធ្វើយ៉ាងណាឲ្យមានហ្វូងមនុស្ស ចូលរួម​យ៉ាងតិចបំផុត ប្រមាណ ៥០០០នាក់ ក្នុង actions មួយ ។ គិតរហូតមកដល់ថ្ងៃនេះ CIA មានអាយុកាល ៧០ឆ្នាំ ហើយនាយក CIA តែងតែត្រូវបានចាត់ទុកថា ជាមន្ត្រីដ៏ជំនិត ឬជាជនដៃស្តាំរបស់ ប្រធានាធិបតីអាមេរិក ក្នុងការងារនៃព័ត៌មាន សម្ងាត់ របស់ប្រទេសជាតិ និងពិភពលោកទាំងមូល ! ។

NSA (National Security Agency) ស្ថាប័ននេះចាប់មានកំណើត កកើតនៅឆ្នាំ១៩៥២ ដែលមានបញ្ជាការដ្ឋានប្រចាំនៅ Fort Meade ក្នុងរដ្ឋ Maryland ។ អង្កការនេះ​មានបុគ្គលិក​បំរើការ ច្រើនរហូតទៅដល់ ២១ ០០០នាក់ ហើយដែលមានកញ្ចប់ថវិកា សម្រាប់ចំណាយ ប្រមាណ ៣.៦កោដ៏​ដុល្លារអាមេរិក ។ NSA ត្រូវបានប្រសិទ្ធិនាមថាជាត្រចៀករបស់ ពិភពលោក ដែលគ្មានទីណា កន្លែងណា គេហដ្ឋានណានិយាយជជែកគ្នា ហើយដែល NSA ចាប់សំឡេង លួចស្តាប់មិនបាននោះទេ! ។ NSA អាចស្តាប់បាននូវរាល់ការសន្ទនា លើពិភពលោកនេះបាន ដោយ NSA មានស្ថានីយ ស្រូបយក សំឡេង ត្រូវបានដាក់ពង្រាយក្នុងគ្រប់ទ្វីបហើយរាល់ស្ថានីយនេះមានទំនាក់ទំនង ដោយផ្ទាល់ជាមួយនិងប្រព័ន្ធ ផ្កាយរណប ដែលហោះក្នុងលំហរ អវកាស ហើយដែល គ្រប់ដណ្តប់ មកលើពិភពលោកនេះទាំងមូល ដោយរលកធាតុអាកាសនោះ ។ រាល់ការទាក់ទង និយាយគ្នា តាម Fax, Phone, Email, Yahoo Viber Tango Telegram ល.ល គឺ NSA បានថតនិងស្តាប់យក​ទាំងអស់! ។ នៅឆ្នាំ១៩៩៨ សភាអ៊ឺរ៉ុបបានធ្វើការថ្កោលទោសដល់រដ្ឋាភិបាល សហរដ្ឋ​អាមេរិក ដោយបានប្រើប្រាស់ប្រព័ន្ធរ៉ាដា Echelon ដើម្បីលួចស្តាប់នូវរាល់ការសន្ទនាគ្នា ​នៅអឺរ៉ុបតាមរយៈ ផ្កាយរណប ! ហើយក៏បានដឹងថា NSA នេះក៏ជាអង្គការមួយយ៉ាង ជំនាញក្នុងការដឹកនាំការងារ មកលើរាល់សកម្មភាព ក្នុងការ Hacking ព័ត៌មានផងដែរ !។

NRO (National Reconnaissance Office) ជាអង្កការសម្ងាត់បំផុត ដែលមានបញ្ជាការដ្ឋាននៅ Chantilly ក្នុងរដ្ឋ Virginia ដោយអង្គការនេះបានកកើតឡើងនៅឆ្នាំ១៩៨០ ក៏ប៉ុន្តែរហូតដល់ឆ្នាំ១៩៩២ ទើបលេច​មុខចេញជាផ្លូវការ ។ NRO គឺជាស្ថាប័នស៊ើបយកការណ៍សម្ងាត់ មួយ ដែលត្រូវបានផ្តល់ថវិកា ច្រើនជាងគេបំផុត (លើស CIA ពីរដង) តែមានមន្ត្រីបុគ្គលិកបម្រើអោយស្ថាប័ននេះ​មានប្រហែល​តែ២០០នាក់ ដែលពួកនេះមានភារកិច្ចជំនាញខាងឡើងជាគំរោង ផែនការក្នុងការបាញ់ឬបង្ហោះផ្កាយរណបទៅ ក្នុងលំហរអាវកាស ដែលផ្កាយរណបទាំងនេះមានមុខងារ សម្រាប់តែលួចមើលពីលើ​អាកាសចុះមកផែនដី (Keyhole, Lacrosse, Rhyolite ) ជ័យជំនៈធំបំផុត នាពេលថ្មីៗនេះ របស់ NRO គឺការបាញ់បង្ហោះចូលទៅលំហរអាកាស នូវប្រព័ន្ធផ្កាយរណបមួយ ដែលអាចផ្តិតយក​រូបថត នូវវត្ថុមួយដ៏តូចស្មើនឹងផ្លែក្រូច នៅទោះបីកន្លែងណាមួយលើផែនដីនេះ ក៏អាចមើលឃើញយ៉ាងច្បាស់ តាមកញ្ចក់ទូរទស្សន៍ នៅ Washingtonដែរ បាន តាមរយៈការបញ្ជូនរូបភាពមួយនេះ ពីផ្កាយរណបឆ្ងាយរាប់ពាន់គីឡូ ម៉ែត្រ នោះដោយរូបភាព ទាំងនេះ ត្រូវបានថតនិងបញ្ចូនទៅបញ្ជាការដ្ឋាន តាមកាលប្រវត្តិរបស់វាដោយជាក់ស្តែងបំផុត ។

DIA (Defense Intelligence Agency) គឺជាស្ថាប័នស៊ើបយកការណ៍សម្ងាត់ របស់កង ទ័ពអាមេរិក ដែលមានកំណើតនៅឆ្នាំ១៩៦១ ហើយស្ថាប័ននេះ ត្រូវបានដាក់​នៅក្នុងមន្ទីរបញ្ចាកោណតែម្តង! ។ មន្ត្រីនិងបុគ្គលិក ដែលបម្រើការនៅក្នុងស្ថាប័ន DIA នេះ មានប្រមាណ ៧០០០នាក់ ត្រូវបានផ្តល់ថវិកាសម្រាប់សកម្មភាពស្មើ ២/៣ របស់ CIA ដែលខ្ទង់ចំណាយនេះមានចំនួនច្រើនលើស៦ដង នៃថវិកាដែលរដ្ឋាភិបាលបារាំង បានចំណាយមក​លើសកម្មភាព សម្រាប់ផ្នែកចារកម្មរបស់បារាំងផងនោះ! ។ DIA មានមុខងារ សម្រាប់តែសំរបសំរួល នូវរាល់ព័ត៌មានសម្ងាត់ បានមកពីការស៊ើបយកការណ៍សម្ងាត់ ពីកងទ័ពជើងអាកាស ជើងទឹក និងជើងគោក ដោយ DIA មានតួនាទីក្នុងការយកមក សំយោគវិភាគ និងសំរាំងយកព័ត៌មានសំខាន់ៗ ពាក់ព័ន្ធដល់បណ្តាទីតាំងយោធា និងយុទ្ធសាស្រ្តរបស់គូបក្ខដិបក្ខនិងពួកប្រទេសជា មិត្ត ។ DIA មានបុគ្គលិកបម្រើការប្រមាណ ២០០០នាក់ ដែលអ្នកទាំងអស់នេះ មួយភាគធំ គឺបាននឹងកំពុងប្រត្តិបត្តិការ​នៅក្រៅ ​ដែនដីអាមេរិក ក្នុងដែនដីបរទេស។

ក្នុងសង្គ្រាមលោកលើកទី២ មានក្រុមចារកម្មមួយ OSS Office of Strategic Services មានមុខងារស៊ើបយកការណ៍សម្ងាត់ ដែលក្រុមនេះ ត្រូវបានបង្កើតឡើងដោយ William Donovan តែដល់ខែតុលា ១៩៤៥ OSS នេះត្រូវបានរំសាយ ។ ពេលនោះ William Donovan បានលើកសំណើសុំអោយ ប្រធានាធិបតី Franklin D Roosevelt បង្កើតអង្កការ ចារកម្មថ្មីមួយ ដែលស្ថិតនៅក្រោមការទទួលខុសត្រូវរបស់ប្រធានាធិបតីដោយផ្ទាល់ ។ ហើយពិតមែនតែសំណូមពរនេះត្រូវមន្ទីរបញ្ចាកោណ ក្រសួងការបរទេស និង FBI ប្រឆាំងជំទាស់ក៏ដោយ ក៏នៅខែមករា ១៩៤៦ ប្រធានាធិបតី Harry S. Truman បានសម្រេចបង្កើតឡើងនូវស្ថាប័ន Central Intelligence Group ។ ពេលនោះ ជាតថភាព ក្នុងសតិអារម្មណ៍ របស់ថ្នាក់ដឹកនាំអាមេរិក មានដិតជាប់​នូវស្នាមរបួសផ្លូវចិត្តមួយដ៏ធ្ងន់ ដោយព្រឹត្តិការណ៍ Pearl Harbour បានធ្វើអោយពួកគេមិន​អាចបំភ្លេចបា​នូវស្លាកស្នាម មួយ នេះ គឺថ្ងៃដ៏ឈឺចាប់បំផុត ៧ ខែធ្នូ ឆ្នាំ១៩៤១ ថ្ងៃដែលកងទ័ព​ហ្វាក់ស៊ីសជប៉ុន បើកការវាយប្រហារ ពីអាកាសមកលើមូលដ្ឋានកងទ័ព ជើងទឹករបស់អាមេរិក Pearl Harbour នៅ Haiwaii ធ្វើឲ្យមានការខូចខាត បាត់បង់យ៉ាងធំធេងហួសពីការស្មាន នាំដល់ផ្នែកចារកម្មរបស់អាមេរិកបាត់ភាពម្ចាស់ការ ក្នុងការវាយតម្លៃ វិភាគសភាព ការណ៍ពេលនោះមិនត្រូវ ។

ឆ្នាំ១៩៤៧ CIA ចាប់កកើតមានជារូបរាងឡើងជាផ្លូវការ ហើយនៅ​ឆ្នាំ១៩៤៩ CIA ត្រូវបានអនុញ្ញាតិ ឲ្យមានសិទ្ធក្នុងការប្រើប្រាស់ថវិកា ដោយសិទ្ធិនេះត្រូវអនុលោមទៅ​តាម គោលការណ៍សម្ងាត់ តែមិនស្ថិតនៅក្រោមការកំណត់របស់ពន្ធដារ ស្តីពីការងាររដ្ឋបាល​ក្នុងការចំណាយទាំងអស់ឡើយ !។ ពេលនោះ CIA មានសិទ្ធិពិសេសមួយដោយមិនចាំបាច់ រាយការណ៍ អំពីអង្កការ​លេខ ការងារចាត់តាំង មុខងារតួរនាទី អោយទៅទោះបីក្រសួងស្ថាប័ន ណាមួយឡើយ ! ដោយ CIA ទទួលខុសត្រូវ តែមួយគត់នៅចំពោះមុខសភា និងការទទួលខុសត្រូវមួយទៀត នៅចំពោះមុខប្រធានាធិបតីតែប៉ុណ្ណោះ !។ នាយក CIA គឺជាសមាជិកអចិន្ត្រៃយ៍ ក្នុងក្រុម​សន្តិសុខរបស់ប្រធានាធិបតីដែលក្នុងនោះក៏មាន នាយករបស់ NSA និង DIA ផងដែរ ។ នៅក្នុងបទបញ្ញាតិក្នុងសេចក្តីណែនាំបង្កើត CIA មានប្រការមួយបាន ចែងយ៉ាងច្បាស់ថា ភារកិច្ចរបស់ CIA គឺការប្រមូលព័ត៌មាន សំរាំងព័ត៌មាន វិភាគព័ត៌មាន និងវាយតម្លៃ នូវព័ត៌មានសម្ងាត់ទាំងអស់ ដែលស៊ើបយកការណ៍បាន ! ។ ក្រោយមក CIA ក៏មានភារកិច្ច ធ្វើការជ្រៀតជ្រែត អន្តរាគមន៍ ចូលមកទីកន្លែង ដែលការងារការទូត ពុំអាចដោះស្រាយបញ្ហានេះបាន ហើយដែលសមត្ថកិច្ច​របស់យោធា ពុំអាចអនវត្តន៍ បាននៅទីនោះ !។

ក៏ប៉ុន្តែ CIA ក្រោយមកបានដើរហួសក្របខ័ណ្ឌ នៃដែនសមត្ថកិច្ចរបស់ខ្លួន រួមទាំងការពុំបានប្រតិបត្តិនូវបទបញ្ជាអោយបាន​ត្រឹមត្រូវតាមការកំណត់ របស់​ប្រធានាធិបតី រហូតដល់មានហេតុការណ៍ខ្លះ CIA បានអត្តនោម័ត ក្នុងការ​អនុវត្តន៍នូវគោល​នយោបាយ ក្រៅប្រទេស ដោយខ្លួនឯង ដូចជាការបង្កើត អោយមាន​អស្ថេរភាព ចលាចល និងការផ្តូលរំលំរដ្ឋាភិបាលបរទេស ជាច្រើនចាប់តាំងពី Allen Dulles ឡើងកាន់តំណែង​ធ្វើជានាយក CIA នាឆ្នាំ១៩៥៣ ក្នុងសម័យកាលសង្គ្រាមត្រជាក់កំពុងឡើង កំដៅ​យ៉ាងខ្ពស់នោះ ។ ពេលនោះ CIA បាន​បង្កើន សកម្ម​ភាពប្រឆាំងទៅនិង រដ្ឋាភិបាលបរទេសណា ដែលមាននិន្នាការនយោបាយ មិនចុះសំរុង ទៅនឹងសហរដ្ឋអាមេរិក ដោយនយោបាយនេះ ត្រូវបានជំរុញ និងលើកកំពស់ ក្នុងការផ្តួលរំលំរដ្ឋា​ភិបាលទាំងអស់នេះ ឲ្យ​ចេញពីអំណាចឲ្យបាន​ ! ។

នៅថ្ងៃទី១៧ កញ្ញា ឆ្នាំ១៩៩៧ CIA បានប្រារព្ធទិវាខួបអនុស្សាវរីយ៍ ៥០ឆ្នាំ ដែលក្នុង​ឱកាសនេះ មានមនុស្សជាច្រើនដែលបានលាក់បំបាងមុខជាយូរឆ្នាំមកហើយតែថ្ងៃនេះ បានបង្ហាញ​មុខ ជាសាធារណៈ ដើម្បីអបអរសាទរ អង្កការ CIA ដែលត្រូវបានបង្កើតឡើងដោយប្រធានាធិបតី Truman ពេលដែលចាប់ផ្តើមមានសង្គ្រាមត្រជាក់មក ។ មនុស្សប្រមាណ ២០០០នាក់ ដែលត្រូវបានចាត់​ទុកថា ជាជនឆ្នើម (Elite Men) បានចូលរួមក្នុងទិវានេះ ។ ពេលនោះប្រធានាធិបតី Bill Clinton បានថ្លែងថា “ខ្ញុំជាអតិថិជនដ៏ប្រចាំរបស់អស់លោកអ្នក ដូច្នេះ ក្នុងឋានៈជាអ្នកទិញទំនិញ ខ្ញុំអាចនិយាយបានថា អស់លោក គឺជាប្រភពជីវិត ក្នុងគោលនយោបាយការបរទេស របស់ខ្ញុំ ក្នុងគ្រប់កាលៈទេសៈ” ។

កត្តាសំខាន់ដែលនាំអោយ Bill Clinton និយាយយ៉ាងដូច្នេះ ដោយ George Tenet នាយកដ៏ក្មេងរបស់ CIA បានពន្យល់បកស្រាយជូនសេតវិមាន នាពេលថ្មីៗនោះថា “ការងារ​របស់ CIA បច្ចុប្បន្ន កាន់តែមានចរិតវិទ្យាសាស្ត្រ បច្ចេកទេសខ្ពស់ ហើយការងារទាំងអស់ គ្មានអ្វីក្រៅអំពីបំរើអោយការងារចារកម្មស៊ើបយកការណ៍សម្ងាត់ លួចរាល់ព័ត៌មានសម្ងាត់ អុសទាញអោយមនុស្សមកបម្រើការងារសម្ងាត់ អោយកាន់តែច្រើន ស៊ីជំរៅនិងមាន​ប្រសិទ្ធភាព ដែលជាហេតុបញ្ជាក់អោយឃើញថា អាមេរិក មានឧត្តមភាពផុតលេខ លើនរណាៗ ទាំងអស់ !។

ជារួម CIA មានមុខនៅគ្រប់ទិសទី តែក្នុងរូបភាពផ្សេងៗពីគ្នា តាំងពីនៅតាមចញ្ជើម​ថ្នល់ រហូតចូលមកក្នុងគ្រប់ក្រសួងមន្ទីរ និស្សិត បញ្ញាវន្ត អង្គការឯកជន ក្រុមហ៊ុននិងហ៊ារចូល ទៅក្នុងគ្រប់អង្គការសាសនា វត្តអារាម ព្រះវិហារកាតូលិក ល.ល ។ ជាការពិត ៥០ឆ្នាំកន្លងមក CIA បានក្តាប់បេះដូងរបស់ពិភពលោក ដោយឆ្លងតាមរយៈព្រឹត្តិការណ៍របស់ ប្រទេសនីមួយៗ និងរបស់សកលលោកទាំងមូល ហើយដែលបច្ចុប្បន្ននេះ CIA កាន់តែមានសកម្មភាព ដ៏កំរោលជាងមុន បន្ទាប់ពីការងើបឡើងដ៏មហិមារបស់ចិននិងភាពរឹងរុស មិនរាថយ របស់រុស្ស៊ីមក! ។

CIA ជាភ្នែក ត្រជៀករបស់អាណាចក្រលាក់មុខ មិនបង្ហាញខ្លួនមួយទៀត (Hidden Empire) ដែលមាន​ថវិកាដ៏មហាសាល និងកូនជឹងប្រមាណ ២០០ ០០០នាក់ ដែលកំពុងតែធ្វើការនៅក្នុងទីងងឹត ក្នុងគ្រប់ទិសទីលើផែនដីនេះ ។

ទីណា កន្លែងណា ហេតុការណ៍អ្វី ដែលក្រសួងការបរទេស អាមេរិកយកការណ៍មិនបាន ក្រសួងការពារជាតិអាមេរិក លូកដៃមិនដល់ គឺសេតវិមានតែងតែប្រគល់ភារកិច្ចនេះអោយ CIA ស្វែងយល់ធ្វើបច្ចុប្បន្នភាពជំនួស ដូ​ចករណីមានហេតុការណ៍ នៅ Serbia, Irak Yemen កូរ៉េខាងជើង ចិន រុស្ស៊ី Turkey Sudan Israel ។.ល។ គ្មានទីណាមួយលើពិភពលោក​នេះ ដែលពុំមាន​ផលប្រយោជន៍របស់អាមេរិកផ្សារភ្ជាប់នៅទីនោះឡើយ ! ហើយបើមានផលប្រយោជន៍ ​របស់អាមេរិកនៅទីនោះហើយ គឺច្បាស់ជា​មានបាតដៃរបស់ CIA ដូចជា អង្កការ​សម្ងាត់ របស់អាមេរិក ទាំង១៥មានការពាក់ព័ន្ធ លូកដៃចូលទីនោះជាដាច់ខាត ! ។ ជារួមមហាជនបានត្រឹមតែដឹងនូវអ្វី ដែល CIA បរាជ័យ ឬជោគជ័យ ដែលត្រូវ Mass Media បង្ហើបឲ្យដឹងតាមការទាមទារ របស់អ្នកនេះ អ្នកនោះ ! តែក្រៅពីនេះ CIA មានរឿងអាស្រូវជាច្រើន ដែលកំពុងតែធ្វើហើយសាហាវ ឃោឃៅជាងនេះរាប់រយដង តែគ្មាននរណាបានដឹងឡើយ ! ។

មានការងារជាច្រើន ដែល CIA បានធ្វើហួសពីក្របខ័ណ្ឌក្បាលម៉ាស៊ីន និងក្រមប្រតិបត្តិ​របស់អាមេរិក ដូចជាការលួច​ព័ត៌មានសម្ងាត់របស់ថ្នាក់ដឹកនាំប្រទេស ឃាតកម្ម រដ្ឋប្រហារ ល.ល ដែលការងារទាំង​អស់នេះ ពោរពេញទៅដោយ​ហានិភ័យខ្ពស់បំផុត ទាំងក្នុងទំនាក់ទំនងការងារ ទាំងក្នុងទំនាក់ទំនងរវាងរដ្ឋ និងរដ្ឋ ! ករណីដែលជាក់ស្តែងបំផុតនោះ គឺបញ្ហា Irak ! ព្រោះបើធ្វើតាមសហគមន៍អន្តរជាតិ គឺត្រូវប្រើវិធានការការទូត និងសម្ពាធសេដ្ឋកិច្ច មកលើរបប Saddam Hussein តែពេលនោះ សេតវិមានដោយមានការឯកភាពពី ព្រឹទ្ធសភា ក្នុងការបើកភ្លើងខៀវអោយ Bill Clinton នៅក្នុងឆ្នាំ១៩៩៦ បានបញ្ជាអោយ CIA ដឹកនាំជនជាតិ Kurdes ដែលរស់នៅភាគខាងជើងរបស់ Irakអោយងើបឡើងធ្វើការ ប៉ះបោរប្រឆាំងនិង Saddam Hussein ដើម្បីជាលេស នយោបាយមួយក្នុងការធ្វើឲ្យមានការប្រល័យពូជសាសន៍ ដើម្បីអាមេរិក​មានទឡ្ហីករណ៍ក្នុងការទម្លាក់ Saddam !។ តែជាអកុសលលើកនេះ ផែនការCIA បានទទួលបរាជ័យ មិនខុសអីនិងការបរាជ័យ​ឆ្នាំ១៩៦២ ពេលដែល Kennedy ចាត់បញ្ជូនពួកគុយបានិរទេសមកវាយរំដោះគុយបា​នៅ ឈូងសមុទ្រ Pig !។

ក្នុងផែនការប្រើប្រាស់ពួក Kurds អោយទម្លាក់ Saddam មិនបានជោគជ័យមក Bill Clinton បានបង្កើនសកម្មភាព​ចារកម្មគ្រប់បែបយ៉ាង ដើម្បីប្រឆាំងទៅនឹងរបប Saddam Hussein ដោយបានបញ្ជាអោយ CIA លួចបន្លំខ្លួនចូលទៅក្នុង ក្រុមត្រួតពិនិត្យ សព្វាវុធ UNSCOM ដែលពេលនោះ រាល់បទដ្ឋានអន្តរជាតិ ពុំត្រូវបានអាមេរិកយកចិត្តទុកដាក់ និង គោរពអ្វីទាំងអស់ ក្រៅអំពី សំណូមពរ ស៊ើបយកការសម្ងាត់ ពី Irak អោយបានជាដាច់ខាត់បម្រើឲ្យផលប្រយោជន៍ សម្រាប់ អាណាចក្រប្រេងកាតរបស់អាមេរិកតែមួយគត់ ! ។

តែក៏មានហេតុការណ៍កើតឡើងជាច្រើនផងដែរ ដោយមានសំណូមពរចង់បានព័ត៌មាន​សម្ងាត់ច្រើន​ពេក បានធ្វើអោយរដ្ឋការអាមេរិក អនុវត្តន៍ នូវគោលនយោបាយការបរទេស មិនសមស្របស៊ីចង្វាក់គ្នា ! ដូចករណី Kurdistan ជាឧទាហរណ៍ស្រាប់ ដោយដៃម្ខាង CIA បានចំណាយថវិកា​យ៉ាងច្រើនដើម្បីចិញ្ចឹមជនជាតិ Kurds ប្រឆាំងទៅនឹងរបប Saddam Hussein ទន្ទឹមនេះ ដៃម្ខាងទៀត អាមេរិកប្រើប្រាស់ប្រព័ន្ធផ្កាយរណបNSAលួ​ចស្តាប់និង តាមដាននូវសកម្មភាព ចលនា និងការចល័តរបស់ Abdullah Ocalanដែលជាមេដឹកនាំ របស់​គណបក្សពលករ Kurdistan ដើម្បីជូនព័ត៌មានសម្ងាត់នេះ ដឹងអំពីទីតាំងនិងសកម្មភាពរបស់ Ocalan ទៅឲ្យអ្នកកាន់អំណាចរបស់ Turkey! ។

ដោយទទួលបានព័ត៌មានសម្ងាត់នេះហើយ ទើបអាជ្ញាធរ Ankara អាចចាប់ខ្លួន Ocalan បាន នៅ Kenya! ហើយដើម្បីសំដែងនូវការដឹងគុណចំពោះCIA ក្នុងការប្រាប់​ទីតាំងរបស់មេក្លោង Ocalan នេះអាជ្ញាធរ Turkey បានសម្រេចបង្កើន​សកម្មភាព និងសហការឲ្យកាន់តែជិតស្និទ្ធថែមទៀត ជាមួយCIA ក្នុងកិច្ចសហការស៊ើបយកការណ៍សម្ងាត់ និងជួយពួក Uyghur នៅក្នុងតំបន់ Xinjiang​របស់ចិន ! ដោយពុំ មានគោល​នយោបាយ ​យុទ្ធសាស្រ្ត ណាមួយច្បាស់លាស់ ទើបជនជាតិ Kurds ដែលរស់នៅតំបន់ភាគខាងជើង របស់ IraK ដែលពេលខ្លះ​ត្រូវបានប្រើប្រាស់ជាឧបករណ៍នយោបាយ ហើយដែលពេលខ្លះត្រូវបានបោះបង់ចោល ទៅតាមសេចក្តីត្រូវការក្នុង បរិបទយុទ្ធសាស្ត្រនៃដំណាក់កាល នីមួយៗ របស់អ្នកកាន់អំណាចនៃសេតវិមាន ប៉ុណ្ណោះ ។

តែពុំមែនឲ្យតែព័ត៌មានCIAទាំងអស់ សុទ្ធតែសុក្រឹត្យត្រឹមត្រូវទាំងអស់នោះទេ ដូចករណីនៅ Sudan ពួក CIA បានឲ្យព័ត៌មានខុស នាំដល់ការសម្រេចរបស់សេតវិមានក្នុងការចេញ បញ្ជាឲ្យទម្លាក់គ្រាប់ បែក មកលើរោងចក្រផលិតឱសថ ដែលមុននេះ ពួកCIA បានជូនព័ត៌មានខុសថា រោងចក្រ នេះបាននិងកំពុងផលិតនូវអាវុធប្រល័យលោកទៅវិញ ! ហើយហេតុការណ៍ទម្លាក់គ្រាប់បែកលើកនេះ បាននាំដល់ការថ្កោលទោស ពីមជ្ឈដ្ឋានមហាជនពិភពលោក ចំពោះអំពើដ៏អមនុស្សធម៌នេះ ! ។

តាមការបង្ហើបឲ្យដឹងនាពេលថ្មីៗនេះ របស់ទស្សនាវដ្តី Newsweek ថា Bill Clinton បានអនុញ្ញតិ ឲ្យCIA ធ្វើសកម្មភាពបំពាន​មកលើពួកប្រទេសសម្ព័ន្ធមិត្ត នៅក្នុងប្លុកNaTo ដោយពួក CIA បាន ដំណើការសម្ងាត់ប្រឆាំងទៅនឹង Milosevic ប្រធានាធិបតី Serbia កន្លងមកដែលក្នុងសកម្មភាពទាំងនេះ រូមមានទាំងការវាយប្រហារមកលើប្រព័ន្ធកុំព្យូទ័រ សំដៅលួចមើលនិងថតចំលងនូវ Accounts របស់ក្រុមគ្រួសារ Milosevic ដែលបានលាក់លុយនៅតាមធនាគារនៅក្រៅប្រទេស ។ពួក Hackers មកពី NSAបានលួចចូលទៅ​ ក្នុងម៉ាស៊ីនរបស់ធនាគារទាំងឡាយ ដែលក្នុង នោះមានប្រទេសជាច្រើនជាសម្ព័ន្ធមិត្តរបស់អាមេរិក ដែលសកម្មភាពទាំងនេះ បានបំពានយ៉ាងកំរោលមកលើដែនអធិបតេយ្យភាព និងបូរណភាព របស់បណ្តាប្រទេសជាមិត្តនៅអឺរ៉ុប ! ។

អំពើអសកម្មរបស់អាមេរិក បានធ្វើឲ្យមានការបាត់បង់នូវជំនឿមកលើសម្ព័ន្ធភាពនៃការរក្សាការ សម្ងាត់របស់ធនាគារទាំងឡាយដែលជាហេតុបច្ច័យនាំឲ្យមាន ការប៉ះពាល់យ៉ាងធ្ងន់ធ្ងរមក លើប្រព័ន្ធឥណទានរបស់ពិភពលោកទាំងមូល !

ទន្ទឹមនេះ ការសម្រេចវាយប្រហារ​មកលើ Serbia ក៏ជាសេចក្តីសម្រេចមួយ ដ៏ខុសឆ្គងរបស់​អាមេរិកផងដែរ ដោយអ្នកកាន់​អំណាចរបស់អាមេរិកបានអនុលោមទៅតាម របាយការណ៍សម្ងាត់ របស់ CIA ដែរ ការវាយតម្លៃខុស​នេះហើយ ប៊ិះនាំទៅដល់ការប្រឈមមុខដាក់គ្នាជាសង្រ្គាម រវាងអាមេរិកនិង រុស្ស៊ី អាមេរិក និង ចិន នៅក្នុងតំបន់នេះ Balkan នេះបើយោងតាមសេចក្តីរាយការណ៍របស់កាសែត Washington Post ចុះថ្ងៃទី២៣ ខែមីនា ឆ្នាំ១៩៩៩ នោះ! ៕

LEAVE A REPLY

Please enter your comment!
Please enter your name here