អ្នកប្រើប្រាស់ហ្វេសប៊ុកនៅទូទាំងពិភពលោកកំពុងត្អូញត្អែពីបញ្ហាស្មុគស្មាញមួយ ពាក់ព័ន្ធនឹងការប្រើប្រាស់បណ្ដាញសង្គមមួយនេះ។ នោះគឺថាពួកគេមិនបានដឹងច្បាស់ពីមិត្ដភក្ដិនៅតាមហ្វេសប៊ុក ដែលបានស្លាប់បាត់បង់ជីវិតឡើយ ផ្ទុយទៅវិញពួកគេបានប្រើហ្វេសប៊ុកអញ្ជើញ(invite)មិត្ដហ្វេសប៊ុកទាំងនោះចូលរួមព្រឹត្ដិការណ៍នានា ឬជូនពរថ្ងៃកំណើតរបស់ពួកគេតាមហ្វេសប៊ុកផង តែតាមពិតពួកគេបានស្លាប់បាត់ទៅហើយ។
ដើម្បីដោះស្រាយបញ្ហានេះក្រុមហ៊ុនហ្វេសប៊ុកនឹងប្រើប្រាស់បច្ចេកវិទ្យាវៃឆ្លាត ជូនដំណឹងដល់អ្នកប្រើប្រាស់។ តាមរយៈបច្ចេកវិទ្យានេះនៅលើProfileហ្វេសប៊ុក នឹងមានការបែងចែកដាច់ចេញពីគ្នា រវាងអ្នកប្រើប្រាស់ហ្វេសប៊ុកដែលស្លាប់និងអ្នកនៅប្រើប្រាស់។ ហ្វេសប៊ុកនឹងនៅតែរក្សានូវកម្រងអនុស្សាវរីយឬការចងចាំរវាងមិត្ដភក្ដិនៅលើហ្វេសប៊ុកដដែល គ្រាន់តែពួកគេអាចដឹងច្បាស់ថាមិត្ដហ្វេសប៊ុកណាម្នាក់បានទទួលមរណភាព ចៀសវាងការភាន់ច្រឡំដូចមុនៗទៀត។ នេះបើតាមការបញ្ជាក់ពីអ្នកស្រីSheryl Sandberg ប្រធានផ្នែកប្រតិបត្ដិការក្រុមហ៊ុនហ្វេសប៊ុក៕
