នាពេលថ្មីៗនេះ ក្រុមហ៊ុន Google និងក្រុមហ៊ុន Apple បានធ្វើការដកកម្មវិធី TikTok (ដែលកំពុងតែពេញនិយម ទូទាំងពិភពលោក) ចេញពីប្រទេសឥណ្ឌា ហើយនេះបើយោងតាម របាយការណ៍ពីប្រភពពត៌មាន Reuters និង Quartz ផងដែរ។ ចំណែកឯទង្វើនេះ គឺត្រូវបានធ្វើឡើងបន្ទាប់ពី ទទួលបានសំណើរពី តុលាការរដ្ឋផ្ទាល់តែម្ដង នៅក្នុងថ្ងៃទី 3 ខែមេសា ដើម្បីហាមឃាត់ មិនឲ្យកម្មវិធី TikTok មានវត្តមាននៅលើ Play Store របស់ក្រុមហ៊ុន Google និង App Store របស់ក្រុមហ៊ុន Apple ក្នុងប្រទេសឥណ្ឌា តទៅទៀតនោះទេ បន្ទាប់ពីមានការព្រួយបារម្ភថា មនុស្សជាច្រើនកំពុងតែ ប្រើប្រាស់វាសម្រាប់ គោលបំណងលើ ប្រធានបទអាសអាភាស និងការកេងប្រវ័ញ្ចលើកុមារនានា។ល។
ប្រសិនបើយោងទៅតាម អ្នកវិភាគពីក្រុមហ៊ុន Sensor Tower បានដាក់បង្ហាញឲ្យឃើញថា កម្មវិធី TikTok ត្រូវទទួលបានអ្នកប្រើប្រាស់ ធ្វើការទាញយកចំនួនជាង 230 លានដងឯណោះ សម្រាប់តែក្នុងប្រទេសឥណ្ឌាប៉ុណ្ណោះ។ លើសពីនេះទៅទៀត អ្នកតំណាងសម្រាប់កម្មវិធី TikTok ក៏បានប្រាប់ទៅកាន់ ប្រភពសារពត៌មាន The Verge ថាក្រុមហ៊ុនរបស់ខ្លួនមាន “ជំនឿលើប្រព័ន្ធយុត្តិធម៌ របស់ប្រជាជនឥណ្ឌា” និងបានបន្ថែមថា “យើងក៏មានសុទិដ្ឋិនិយម អំពីលទ្ធផលយ៉ាងល្អ ដែលក្រុមហ៊ុន TikTok ទទួលបាន ដោយមានអ្នកប្រើប្រាស់ សកម្មជាប្រចាំខែជាង 120 លាននាក់ឯណោះ នៅក្នុងប្រទេសឥណ្ឌា”។
សរុបមក មូលហេតុចម្បង ដែលធ្វើការឲ្យមាន បញ្ហាដ៏ធំនេះកើតឡើង គឺដោយសារតែ មានការព្រួយបារម្ភពីសមាជិកសភា ក្នុងប្រទេសឥណ្ឌាថា ការបន្ដប្រើប្រាស់កម្មវិធី TikTok អាចលើកទឹកចិត្ត យុវវ័យនិងក្មេងៗជំនាន់ក្រោយ ឲ្យចូលរួមក្នុងការ “ការរិចរិលនៃវប្បធម៌ដើម” ឬក៏ “ប៉ះពាល់ដល់វប្បធម៌ជាតិ” ថែមទៀតផង។
