នៅថ្ងៃទី ២៥ ខែមេសានេះ Viettel Group ដែលជាក្រុមហ៊ុនទូរគមនាគមន៍ដ៏ធំមួយរបស់វៀតណាម បានធ្វើការសាកល្បងបានសម្រេចនូវការចេញផ្សាយសេវា 5G បានសម្រេច ក្នុងតំបន់ Hoàn Kiếm នៃទីក្រុងហាណូយ។
តាមការឲ្យដឹងពី Viettel ល្បឿនអ៊ីនធឺណិត 5G ដែលគេសាកល្បងគឺមានចន្លោះពី ៦០០ ទៅ ៧០០ Mbps ដែលស្មើនឹងល្បឿនសេវា 5G របស់ក្រុមហ៊ុន Verizon ក្នុងសហរដ្ឋអាមេរិកដែរ។ កាលពីខែមេសា ក្រុមហ៊ុននេះបានសាងសង់ស្ថានីយ 5G ដំបូងនៅវៀតណាម នៅក្នុងតំបន់ Hoàn Kiếm។ ស្ថានីយពីរទៀតគឺស្ថិតនៅតំបន់ Duy Tan និង Tran Huu Duc ទីក្រុងហាណូយដូចគ្នា។
តាមរយៈការសាកល្បងសេវា 5G ចាប់ពីខែមេសានេះ វៀតណាមបានសាងកេរ្តិ៍ឈ្មោះរបស់ខ្លួនថែមមួយកម្រិតទៀត ថាជាប្រទេសជឿនលឿនមួយលើពិភពលោក។ បច្ចុប្បន្ននេះមានតែសហរដ្ឋអាមេរិក និងកូរ៉េខាងត្បូងប៉ុណ្ណោះ ដែលកំពុងចាប់ផ្ដើមដាក់ដំណើរការសេវា 5G ជាលក្ខណៈទ្រង់ទ្រាយធំ។
ក្រៅពីក្រុមហ៊ុន Viettel នេះ ក្រុមហ៊ុន MobiFone ក៏ទទួលបានអាជ្ញាប័ណ្ណខាងសេវា 5G នេះដែរ ដោយសម្រាប់ការធ្វើតេស្តរយៈពេលមួយឆ្នាំចាប់ពីថ្ងៃទី ២៣ ខែមេសា ឆ្នាំ ២០១៩ ដល់ថ្ងៃទី ២២ ខែមេសាឆ្នាំ ២០២០។ ក្រុមហ៊ុនទូរគមនាគមន៍ធំមួយទៀតនៅវៀតណាម ឈ្មោះ VNPT VinaPhone មិនទាន់បង្ហាញគម្រោងទាក់ទងនឹងសេវា 5G នេះឡើយ៕
![](https://i0.wp.com/cdn.nctc.gov.kh/2019/04/5cc5505eb92d1_1556434980_large.jpg?resize=696%2C392&ssl=1)