នៅថ្ងៃព្រហស្បតិ៍នេះបណ្ដាញសង្គមយក្ស Facebook បានប្រកាសអំពីរបាយការណ៍ហិរញ្ញវត្ថុប្រចាំត្រីមាសទី ១ ឆ្នាំ ២០១៩ ដែលជាលទ្ធផលគឺអាចរកចំណូលបាន ១៥,០៨ ពាន់លានដុល្លារ ខ្ពស់ជាងការព្យាករណ៍របស់ Wall Street។
ក្នុងសេចក្ដីប្រកាសដដែលនេះ Facebook ក៏បានឲ្យដឹងថា ខ្លួនបានត្រៀមកញ្ចប់លុយ ៣ ពាន់លានដុល្លារ សម្រាប់សម្រួលគ្នាជាមួយនឹងគណៈកម្មការពាណិជ្ជកម្មសហព័ន្ធ (FTC) ដែលអាចពិន័យ Facebook ចន្លោះពី ៣ ទៅ ៥ ពាន់លានដុល្លារ លើបញ្ហាសិទ្ធឯកជន។
គួរដឹងថា Facebook ទទួលរងការរំខានឥតឈប់ឈរក្នុងរយៈពេល ២ ឆ្នាំចុងក្រោយនេះ មានចាប់តាំងពីរឿងលេចធ្លាយទិន្នន័យសម្ងាត់អ្នកប្រើដល់ក្រុមហ៊ុន Cambridge Analytica រហូតដល់ការផ្សព្វផ្សាយអំពីពាក្យសំដីមិនសមរម្យបញ្ឆេះអំពើប្រល័យពូជសាសន៍នៅប្រទេសមីយ៉ាន់ម៉ាជាដើម។
ការពិន័យនេះ អាចជាការពិន័យដ៏ធំមួយសម្រាប់ Facebook ក្នុងប្រវត្តិសាស្ត្ររបស់ខ្លួន ប៉ុន្តែវានៅតិចតួចណាស់បើប្រៀបនឹងចំណូលប្រចាំឆ្នាំរបស់ក្រុមហ៊ុន ដែលអាចរកបានរាប់ពាន់លានដុល្លារក្នុងមួយឆ្នាំៗ។
ខាងក្រោមជាទិន្នន័យសំខាន់អំពីរបាយការណ៍ហិរញ្ញវត្ថុប្រចាំត្រីមាសទី ១ ឆ្នាំ ២០១៩ របស់ Facebook ៖
- ចំណូល ៖ ១៥,០៨ ពាន់លានដុល្លារ (កើនឡើង ២៦% ធៀបនឹងឆ្នាំមុន)
- អ្នកប្រើប្រាស់សកម្មប្រចាំថ្ងៃ ៖ ១,៥៦ ពាន់លាននាក់
- អ្នកប្រើប្រាស់សកម្មប្រចាំខែ ៖ ២,៣៨ ពាន់លាននាក់
