មន្ត្រីផ្នែកច្បាប់ជាន់ខ្ពស់ម្នាក់របស់ក្រុមហ៊ុន Huawei លោក Song Liuping បានអះអាងថាការដាក់បញ្ចូលក្រុមហ៊ុនយក្សចិនមួយនេះទៅក្នុងបញ្ជីខ្មៅរបស់សហរដ្ឋអាមេរិក អាចបង្កជាគ្រោះថ្នាក់មួយមិនធ្លាប់មាន ពីមុនមក ដែលនឹងធ្វើឱ្យប៉ះពាល់ដល់អ្នកប្រើប្រាស់រាប់ពាន់លាននាក់ នៅលើពិភពលោក។ នេះបើតាមការចេញផ្សាយដោយសារព័ត៌មាន BBC នៅថ្ងៃពុធ ទី២៩ ខែឧសភា ឆ្នាំ២០១៩។
លោក Song Liuping ធ្វើការកត់សម្គាល់ខាងលើនៅក្នុងសន្និសីទសារព័ត៌មានមួយនៅថ្ងៃពុធនេះ ហើយថ្លែង នាឱកាសនោះ លោកក៏បានបញ្ជាក់ដែរថាការដាក់បញ្ចូលក្រុមហ៊ុន Huawei ទៅក្នុងបញ្ជីខ្មៅក៏នឹងបង្កផល អវិជ្ជមានដោយផ្ទាល់ដល់បណ្ដាក្រុមហ៊ុនអាមេរិក រួមទាំងវិស័យការងារផងដែរ។
គួរជម្រាបថា ដោយអះអាងពីបញ្ហាសន្តិសុខជាតិ រដ្ឋបាលប្រធានាធិបតីអាមេរិក លោក ដូណាល់ ត្រាំ បានបញ្ចូលក្រុមហ៊ុន Huawei ក្នុងបញ្ជីខ្មៅមួយដែលហាមក្រុមហ៊ុនអាមេរិកនានាធ្វើពាណិជ្ជកម្មជាមួយក្រុមហ៊ុនយក្សចិនមួយនេះ។ ប៉ុន្តែ Huawei បានទាត់ចោលការព្រួយបារម្ភីបញ្ហាសន្តិសុខជាតិរបស់ទីក្រុង វ៉ាស៊ីនតោន៕
![](https://i0.wp.com/cdn.nctc.gov.kh/2019/05/fn-2019-05-29-17-33-06-0.jpg?resize=660%2C371&ssl=1)