រដ្ឋាភិបាលអេហ្ស៊ីបបានថ្កោលទោសការវាយប្រហារភេរវកម្ម បានកំណត់គោលដៅភូមិ Mikhas នៅក្នុងខេត្ត Diyala ប្រទេសអ៊ីរ៉ាក់។
នៅក្នុងសេចក្តីថ្លែងការណ៍មួយនៅថ្ងៃអាទិត្យ ទី១៤ ខែមិថុនា ឆ្នាំ២០២០ ក្រសួងការបរទេសបានចូលរួមរំលែកទុក្ខដល់ក្រុមគ្រួសារជនរងគ្រោះ ដោយជូនពរដល់អ្នករងរបួសឱ្យបានឆាប់ជាសះស្បើយឡើងវិញ។
សេចក្តីថ្លែងការណ៍បានកត់សម្គាល់ថា រដ្ឋាភិបាលអេហ្ស៊ីបឈរជាមួយរដ្ឋាភិបាលអ៊ីរ៉ាក់ និងប្រជាជនដែលប្រឈមមុខនឹងអំពើភេរវកម្ម និងភាពជ្រុលនិយម។
បើយោងតាមទីភ្នាក់ងារ ANADOLU AGENCY បានឱ្យដឹងថា កាលពីថ្ងៃអាទិត្យមនុស្សចំនួន៦នាក់ ត្រូវបានសម្លាប់ នៅក្នុងវាយប្រហារដោយក្រុមភេរវករ Daesh/ISIS នៅក្នុងខេត្ត Diyala ភាគខាងជើងប្រទេសអ៊ឺរ៉ាក់។
គួររំលឹកផងដែរថា ក្នុងរយៈពេលប៉ុន្មានខែថ្មីៗនេះក្រុមសកម្មប្រយុទ្ធ Daesh/ISIS បានបង្កើនការវាយប្រហារជាពិសេសនៅតំបន់រវាងទីក្រុង Kirkuk, តំបន់ Salahuddin (ភាគខាងជើង) និងខេត្ត Diyala (ខាងកើត) ដែលគេស្គាល់ថាជា “តំបន់ត្រីកោណនៃការស្លាប់” ។
នៅឆ្នាំ២០១៧ ប្រទេសអ៊ីរ៉ាក់បានប្រកាសជ័យជំន័យរបស់ខ្លួន លើក្រុមសកម្មប្រយុទ្ធ Daesh / ISIS តាមរយៈការដណ្តើមកាន់កាប់ទឹកដីដែលបាត់បង់តាំងពីឆ្នាំ២០១៤ត្រឡប់មកវិញ៕
ប្រែសម្រួល៖ ឱក សុវណ្ណារ័ត្ន
ប្រភពព័ត៌មាន State Information Services Egypt ផ្សាយថ្ងៃទី១៥ ខែមិថុនា ឆ្នាំ២០២០
