សេចក្តីថ្លែងការណ៍យោធាមួយធ្វើឡើងនៅថ្ងៃអាទិត្យលើកឡើងថា មានការប៉ះទង្គិចគ្នារវាងកម្លាំងសន្តិសុខប៉ាគីស្ថាន និងក្រុមភេរវករ នៅក្នុងខេត្ត Khyber Pakhtunkhwa ភាគពាយព្យនៃប្រទេសប៉ាគីស្ថាន។ ហេតុការណ៍នោះបណ្តាលឱ្យមន្ត្រីយោធាម្នាក់ និងទាហានម្នាក់ស្លាប់ និងបណ្តាលឱ្យទាហានពីរនាក់រងរបួស ។
ប្រព័ន្ធផ្សព្វផ្សាយរបស់ទ័ពប៉ាគីស្ថាន ដែលជាភ្នាក់ងារទំនាក់ទំនងសាធារណៈអន្តរសេវាកម្ម (Inter-Services Public Relations)និយាយនៅក្នុងសេចក្តីថ្លែងការណ៍ថា ក្រុមភេរវករបានបាញ់រះទៅលើកងកម្លាំងទ័ពនៅពេលកងកម្លាំងទាំងនោះកំពុងយាមល្បាតនៅក្បែរព្រំដែននៃតំបន់សម្ព័ន្ធ Waziristan ខាងជើង និងWaziristanខាងត្បូង។ ប្រភពបន្ថែមថា អំឡុងពេលប្រឈមមុខគ្នា ភេរវករម្នាក់ក៏ត្រូវកងទ័ពបាញសម្លាប់ផងដែរ។ ក្រោយពីមានការវាយប្រហាររួច កម្លាំងការពារសន្តិសុខបានបើកប្រតិបត្តិការនៅតំបន់នោះ និងបំផ្លាញទីតាំងរបស់ភេរវករមួយកន្លែង។
ពុំទាន់មានក្រុមណាចេញមុខអះអាងទទួលខុសត្រូវចំពោះកាវាយប្រហារនៅឡើយ។
សូមបញ្ជាក់ជូនផងដែរ តំបន់សម្ព័ន្ធនេះធ្លាប់ជាចំណុចប្រសព្វនៃការធ្វើសង្គ្រាម ក៏ប៉ុន្តែក្រោយពីកងកម្លាំងការពារសន្តិសុខធ្វើប្រតិបត្តិការបានជោគជ័យ ការវាយប្រហារភេរវកម្មមានការកាត់បន្ថយយ៉ាងខ្លាំង ហើយសន្តិភាពត្រូវបានស្តារឡើងវិញ។ ទោះជាយ៉ាងណា ការវាយប្រហារជាញឹកញាប់នៅតែបន្តកើតមាននៅក្នុងតំបន់នោះ។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២១ ខែមិថុនា ឆ្នាំ២០២០
