នៅថ្ងៃអង្គារ ទី៣០ ខែមិថុនា ដើមសប្តាហ៍នេះ រដ្ឋាភិបាលស៊ូដង់បានបញ្ជាក់ថា បាតុករម្នាក់ត្រូវបានសម្លាប់នៅទីក្រុង Omdurman ក្នុងអំឡុងពេលធ្វើបាតុកម្មទ្រង់ទ្រាយធំនៅរដ្ឋធានី Khartoum និងទីក្រុងដទៃទៀត។
រដ្ឋមន្ត្រីក្រសួងព័ត៌មាន និងជាអ្នកនាំពាក្យរបស់ប្រទេសស៊ូដង់លោក Faisal Mohamed Saleh មានប្រសាសន៍នៅក្នុងសេចក្តីថ្លែងការណ៍មួយថា៖ “បើទោះបីជា ធម្មជាតិនៃការធ្វើបាតុកម្មមានលក្ខណៈប្រកបដោយសន្តិភាពក៏ការធ្វើបាតុកម្មបានរីករាលដាលបណ្តាលឱ្យកើតអំពើរហឹង្សានាំឱ្យមានមនុស្សស្លាប់ និងរងរបួសនៅក្នុងរដ្ឋធានី និងរដ្ឋនានា” ។
លោកបន្ថែមថា ស្ថាប័នតុលាការនឹងធ្វើការស៊ើបអង្កេតប្រកបដោយតម្លាភាពមួយដើម្បីកំណត់ការទទួលខុសត្រូវ និងផ្តន្ទាទោសដល់ជនល្មើសពីការរំលោភបំពានដែលមិនអាចទទួលយកបានទាំងនេះ។ ពុំទាន់មានព័ត៌មានលំអិតស្តីពីជនរងគ្រោះនោះទេ។
គួរបញ្ជាក់ផងដែរថា នៅថ្ងៃអង្គារដើមសប្តាហ៍នេះ មានក្រុមបាតុករស៊ូដង់ចំនួនរាប់ម៉ឺននាក់ បានធ្វើបាតុកម្មនៅទីក្រុង Khartoum និងទីក្រុងដទៃផ្សេងទៀត ដោយពួកគេបានទាមទារឱ្យមានការកែទម្រង់នយោបាយ និងផ្លាស់ប្តូររបបប្រជាធិបតេយ្យ។ ចាប់ពីខែសីហា ឆ្នាំ២០១៩ កងកម្លាំងសម្ព័ន្ធយោធា និងជនស៊ីវិលមួយចំនួនបានកាន់អំណាចនៅក្នុងប្រទេសស៊ូដង់ក្នុងរយៈពេលអន្តរកាល ៣៩ខែក្រោយពីមានបដិវត្តន៍ដ៏កក្រើកមួយ ដែលបានបណ្តេញអតីតប្រធានាធិបតី Omar al-Bashir នៅខែមេសាឆ្នាំមុន៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយឡើងវិញថ្ងៃទី០១ ខែកក្កដា ឆ្នាំ២០២០
