អគ្គនាយករងភ្នាក់ងារថាមពលអាតូមិកអន្តរជាតិ (IAEA) លោក Rafael Mariano Grossi បានធ្វើដំណើរទៅទីក្រុងតេហេរ៉ង់នៅថ្ងៃច័ន្ទទី២៤ ខែសីហា ដើមនេះដើម្បីជួបជាមួយអាជ្ញាធរជាន់ខ្ពស់របស់ប្រទេសអ៊ីរ៉ង់។ នេះគឺជាដំណើរទស្សកិច្ចដំបូងរបស់លោកចាប់តាំងពីលោកចូលធ្វើការក្នុងការិយាល័យនៅខែធ្នូ ឆ្នាំមុន។
នៅក្នុងដំណើរនេះមានគោលបំណងសំខាន់លើដោះស្រាយកិច្ចសហប្រតិបត្តិការរបស់អ៊ីរ៉ង់ជាមួយទីភ្នាក់ងារថាមពលអាតូមិកអន្តរជាតិ (IAEA) និងជាពិសេសស្នើរដល់ភាគីអ៊ីរ៉ង់ក្នុងការចូលទៅកាន់ទីតាំងដែលបានស្នើសុំ។
ទីក្រុងតេហេរ៉ង់និយាយថា ដំណើរទស្សនកិច្ចរបស់លោក Grossi នឹងពង្រឹងចំណងមិត្តភាព និងកសាងការជឿទុកចិត្តគ្នារវាងទីក្រុងតេហេរ៉ង់ និងភ្នាក់ងារថាមពលអាតូមិកអន្តរជាតិ IAEA។ ទោះយ៉ាងណានៅក្នុងសេចក្តីថ្លែងការណ៍មួយធ្វើឡើងនៅថ្ងៃសៅរ៍លោក Grossi មានប្រសាសន៍ថា លោកនឹងដោះស្រាយបញ្ហាសំខាន់ ជាពិសេសការចូលទៅត្រួតពិនិត្យនៅតំបន់ដែលបានស្នើរសុំ។
អ្នកនាំពាក្យក្រសួងការបរទេសអ៊ីរ៉ង់លោក Saeed Khatibzadeh ប្រាប់អ្នកយកព័ត៌មានថា “ដរាបណា IAEA ធ្វើសកម្មភាពដោយផ្អែកលើភាពមិនលំអៀង និងរក្សាខ្លួនពីសម្ពាធនយោបាយរបស់ប្រទេសផ្សេងៗ នោះវានឹងមិនមានបញ្ហារវាង IAEA និងទីក្រុងតេហេរ៉ង់នោះទេ” ។
មន្ត្រីជាន់ខ្ពស់នុយក្លេអ៊ែរអ៊ីរ៉ង់និយាយនៅថ្ងៃអាទិត្យថា IAEA ចង់ចូល និងត្រួតពិនិត្យទីតាំងចំនួនពីរកន្លែង ដោយមួយកន្លែងស្ថិតនៅជិតក្រុងតេហេរ៉ង់ និងមួយកន្លែងទៀតស្ថិតនៅជិតទីក្រុងអ៊ីហ្វាហាន (Isfahan)។
ដំណើរទស្សនកិច្ចរបស់លោក Grossi ធ្វើឡើងនៅសប្តាហ៍មុនក្រោយពីទីក្រុងវ៉ាស៊ីនតោនបានជំរុញដល់ក្រុមប្រឹក្សាសន្តិសុខសហរដ្ឋអាមេរិកដើម្បីដាក់ទណ្ឌកម្មអន្តរជាតិលើក្រុង តេហេរ៉ង់ ដែលត្រូវគេដកចេញក្រោមកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ជាមួយប្រទេសមហាអំណាច។
ទោះជាយ៉ាងណា អាជ្ញាធរអ៊ីរ៉ង់និយាយថា ដំណើរទស្សនកិច្ចរបស់លោក Grossi ពុំមានជាប់ទាក់ទងនឹងការផ្លាស់ប្តូរសកម្មភាពរបស់សហរដ្ឋអាមេរិកក្នុងដកដាក់ទណ្ឌកម្មទាំងអស់លើប្រទេសអ៊ីរ៉ង់នោះទេ ដោយភាគីផ្សេងទៀតនៃកិច្ចព្រមព្រៀងមានទាំងប្រទេសរុស្ស៊ី ប្រទេសចិន ប្រទេសអង់គ្លេស ប្រទេសបារាំង និងប្រទេសអាឡឺម៉ង់មិនបានគាំទ្រ។
គួររំលឹកផងដែរថា នៅឆ្នាំ២០១៨ ប្រធានាធិបតី Donald Trump បានដកសហរដ្ឋអាមេរិកចេញពីកិច្ចព្រមព្រៀងហើយបានដាក់ទណ្ឌកម្មមួយចំនួនឡើងវិញ ដែលជាកត្តាធ្វើឱ្យសេដ្ឋកិច្ចរបស់ទីក្រុងតេហេរ៉ង់ធ្លាក់ចុះ។ ជាការឆ្លើយតបទៅនឹងសកម្មភាពនេះ ប្រទេសអ៊ីរ៉ង់បានសងសឹកដោយកាត់បន្ថយអនុលោមតាមការរឹតត្បិតរបស់កតិកាសញ្ញា។
លោក Khatibzadeh មានប្រសាសន៍ថា លោក Grossi បានជួបជាមួយមន្ត្រីជាន់ខ្ពស់អ៊ីរ៉ង់ក្នុងអំឡុងពេលដំណើរទស្សនកិច្ច រួមទាំងរដ្ឋមន្ត្រីក្រសួងការបរទេស និងប្រធានអង្គភាពនុយក្លេអ៊ែររបស់ប្រទេសនេះផងដែរ៕
ប្រែសម្រួល៖ ប៉ោក លក្ខិណា
ប្រភពព័ត៌មាន IAEA ចេញផ្សាយថ្ងៃទី២២ ខែសីហា ឆ្នាំ២០២០
