ទូរទស្សន៍ Houthi គ្រប់គ្រងដោយ al-Masirah រាយការណ៍នៅថ្ងៃអាទិត្យ ទី០៦ ខែកញ្ញា ថាកងជីវពល Houthi ក្នុងប្រទេសយេម៉ែននិយាយថា ពួកគេបានបើកការវាយប្រហារលើអាកាសយានដ្ឋានព្រំដែនប្រទេសអារ៉ាប៊ីសាអ៊ូឌីត។
ទូរទស្សន៍ផ្សាយដោយដកស្រង់សេចក្តីថ្លែងការណ៍របស់អ្នកនាំពាក្យយោធា Houthi លោក Yahya Sarea ថា៖ “ការវាយប្រហារលើអាកាសយានដ្ឋានអន្តរជាតិ Abha ជាការឆ្លើយតបនឹងទៅការវាយប្រហារតាមអាកាសរបស់កងកម្លាំងចម្រុះដឹកនាំដោយអារ៉ាប៊ីសាអូឌីតលើប្រទេសយេម៉ែន” ។
ទូរទស្សន៍ Houthi មិនបានផ្តល់ព័ត៌មានលម្អិតស្តីពីអាវុធដែលគេប្រើប្រាស់ក្នុងការវាយប្រហារនោះទេ ប៉ុន្តែនៅក្នុងការវាយប្រហារមុនៗ ក្រុមឧទ្ទាមនោះធ្លាប់បានប្រើប្រាស់មីស៊ីលផ្លោង និងយន្តហោះគ្មានមនុស្សបើក។
អាកាសយានដ្ឋាននោះមានទីតាំងស្ថិតនៅក្នុងទីក្រុង Abha ដែលជារដ្ឋធានីរបស់ខេត្ត Asir នៅភាគនិរតីនៃប្រទេសអារ៉ាប់ប៊ីសាអូឌីត។
ប្រទេសយេម៉ែនបានធ្លាក់ក្នុងសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលក្រុមឧទ្ទាម Houthi គាំទ្រដោយអ៊ីរ៉ង់ធ្វើការគ្រប់គ្រងភាគខាងជើងប្រទេស និងបានបង្ខំរដ្ឋាភិបាលគាំទ្រដោយប្រធានាធិបតីអារ៉ាប៊ីសាអូឌីតលោក Abd-Rabbu Mansour Hadi ចេញពីរដ្ឋធានី Sanaa ។
គួររំលឹកផងដែរថា សម្ព័ន្ធយោធាដឹកនាំដោយអារ៉ាប៊ីសាអូឌីតបានធ្វើអន្តរាគមន៍ក្នុងជម្លោះប្រទេសយេម៉ែននៅខែមីនា ឆ្នាំ ២០១៥ ដើម្បីគាំទ្ររដ្ឋាភិបាលហាឌី (Hadi) ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០៧ ខែកញ្ញា ឆ្នាំ២០២០
