យោធាប៉ាគីស្ថាននិយាយនៅថ្ងៃចន្ទថា ភេរវករចំនួន០៥នាក់រួមទាំងមេបញ្ជាការភេរវករម្នាក់ត្រូវគេសម្លាប់ក្នុងសង្កាត់មួយនៅភាគពាយ័ព្យនៃប្រទេសប៉ាគីស្ថាន។
សេចក្តីថ្លែងការណ៍មួយរបស់កងទ័ពនិយាយថា មេបញ្ជាការភេរវករដែលគេតាមចាប់ខ្លួនលោក Waseem Zikriya ត្រូវកងកម្លាំងសន្តិសុខសម្លាប់រួមជាមួយសមាជិកភេរវករចំនួន០៤នាក់ផ្សេងទៀតនៅក្នុងប្រតិបត្តិការប្រតិបត្តិការចារកម្មរបស់កងកម្លាំងសន្តិសុខនៅក្នុងសង្កាត់ Mir Ali ភាគខាងជើងនៃខេត្ត Waziristan ដែលមានទីតាំងស្ថិតនៅជាប់នឹងប្រទេសអាហ្វហ្គានីស្ថាន។
សេចក្តីថ្លែងការណ៍ពីបណ្តាញផ្សព្វផ្សាយព័ត៌មានរបស់កងទ័ពទំនាក់ទំនងសាធារណៈអន្តរសេវាកម្មនិយាយថា ភេរវករចំនួន ១០នាក់ផ្សេងទៀតត្រូវកងកម្លាំងសន្តិសុខចាប់ខ្លួនបាន។
យោងតាមប្រភពព័ត៌មានពីមេបញ្ជាការដែលជាអ្នកគ្រប់គ្រងតំបន់លោក Haider Khel បានឲ្យដឹងថា ភេរវករនៅក្នុងសង្កាត់ Mir Ali ត្រូវគេតាមចាប់ខ្លួនខណៈដែលមេដឹកនាំភេរវករគឺជាមេក្លោងនៅក្នុងសកម្មភាពភេរវកម្មចំនួន៣ផ្សេងៗគ្នាចាប់តាំងពីឆ្នាំ២០១៩ ។
មេបញ្ជាការភេរវករបានចូលរួមដោយផ្ទាល់នៅក្នុងការសម្លាប់ដោយធ្វើសកម្មភាពវាយប្រហារទៅលើកងកម្លាំងសន្តិសុខ និងសម្លាប់មន្ត្រីរដ្ឋាភិបាលនៅក្នុងតំបន់នោះ។
យោធាប៉ាគីស្ថានធ្វើប្រតិបត្តិការជាបន្តបន្ទាប់ប្រឆាំងនឹងក្រុមភេរវករនៅភាគខាងជើងខេត្ត Waziristan។ បើទោះបីជាមានការបង្ក្រាបភេរវករនៅតំបន់នោះឱ្យមានភាពស្ងប់ស្ងាត់ក៏ដោយក៏សមាជិកក្រុមភេរវករដែលនៅសេសសល់នៅតែបន្តធ្វើសកម្មភាពវាយប្រហារលើកងកម្លាំងសន្តិសុខជាបន្តបន្ទាប់។
គួរបញ្ជាក់ផងដែរថា មន្ត្រីយោធាម្នាក់និយាយនៅថ្ងៃចន្ទថា ទាហានប៉ាគីស្ថានចំនួនពីរនាក់ក៏បានរងរបួសយ៉ាងធ្ងន់ធ្ងរផងដែរ ក្រោយពីខ្មាន់កាំភ្លើងមិនស្គាល់អត្តសញ្ញាណមួយក្រុមបានបើកការបាញ់ប្រហារទៅលើរថយន្តរបស់កងកម្លាំងសន្តិសុខនៅភាគខាងជើងខេត្ត Waziristan។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៧ ខែកញ្ញា ឆ្នាំ២០២០
