យោធាអ៊ីរ៉ាក់និយាយថា មន្ត្រីប៉ូលិសជាន់ខ្ពស់អ៊ីរ៉ាក់ម្នាក់ និងជំនួយការរបស់គាត់ចំនួនពីរនាក់ត្រូវគេសម្លាប់នៅថ្ងៃពុធ ទី៣០ នៅក្នុងហេតុការណ៍ផ្ទុះគ្រាប់បែកនៅតាមដងផ្លូវក្នុងខេត្ត Salahudin នៅភាគខាងជើងនៃរដ្ឋធានី Baghdad ។
ការិយាល័យប្រព័ន្ធផ្សព្វផ្សាយនៃបញ្ជាការប្រតិបត្តិការចម្រុះអ៊ីរ៉ាក់លើកឡើងក្នុងសេចក្តីថ្លែងការណ៍មួយថា គ្រាប់បែកតាមដងផ្លូវផ្ទុះឡើងនៅក្បែររថយន្តយោធាមួយនៅតំបន់វាលខ្សាច់ al-Tharthar ភាគខាងលិចនៃទីប្រជុំជន Baiji ចម្ងាយប្រមាណ២០០ គីឡូម៉ែត្រនៅខាងជើងទីក្រុងបាកដាដ (Baghdad) ក្នុងអំឡុងពេលយុទ្ធនាការស្វែងរកគ្រាប់។
ការផ្ទុះនេះបានសម្លាប់មេបញ្ជាការកងវរសេនាធំម្នាក់នៃខេត្ត Salahudin និងជំនួយការចំនួនពីរនាក់របស់គាត់។ ទន្ទឹមនឹងនេះដែរ លោក Mohammed al-Bazi ប៉ូលិសខេត្ត Salahudin បញ្ជាក់បន្ថែមថា លោក Mutasim al-Qaisi និងជំនួយការរបស់គាត់ចំនួន ០២នាក់ស្លាប់នៅក្នុងហេតុការណ៍ផ្ទុះក្បែរទីក្រុង Baiji ។
សូមរំលឹកផងដែរថា ការវាយប្រហារនោះកើតឡើងនៅពេលដែលក្រុមសកម្មប្រយុទ្ធរដ្ឋអ៊ីស្លាម (IS) បង្កើនការវាយប្រហាររបស់ខ្លួនទៅលើកងកម្លាំងសន្តិសុខ និងជនស៊ីវិលនៅក្នុងខេត្ត Sunni ដែលគ្រប់គ្រងដោយអតីតរដ្ឋអ៊ីស្លាមបណ្តាលឱ្យមានមនុស្សស្លាប់និងរបួសចំនួនរាប់សិបនាក់។ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងចាប់តាំងពីកម្លាំងសន្តិសុខអ៊ីរ៉ាក់បានកម្ចាត់សមាជិកក្រុមសកម្មប្រយុទ្ធ IS នៅទូទាំងប្រទេសនៅចុងឆ្នាំ២០១៧ ។
ទោះជាយ៉ាងណាក៏ដោយ សមាជិក IS នៅសេសសល់បង្កប់ខ្លួននៅតាមតំបន់ទីក្រុងឬវាលខ្សាច់និងតំបន់រឹងមាំដោយធ្វើការវាយប្រហារឆ្មក់ជាញឹកញាប់ប្រឆាំងនឹងកម្លាំងសន្តិសុខនិងជនស៊ីវិល។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី៣០ ខែកញ្ញា ឆ្នាំ២០២០