មន្ត្រីយោធាម្នាក់និយាយថា យ៉ាងហោចណាស់សមាជិកក្រុមសកម្មប្រយុទ្ធអាល់សាបាបចំនួន០៤នាក់ត្រូវគេសម្លាប់នៅថ្ងៃពុធ ទី០៧ ខែតុលា នៅក្នុងប្រតិបត្តិការមួយដែលធ្វើឡើងដោយកងទ័ពជាតិសូម៉ាលីនៅតំបន់កណ្តាល និងខាងក្រោមនៃតំបន់ Lower Shabelle ភាគខាងត្បូងប្រទេសសូម៉ាលី។
មេបញ្ជាការនៃកងកម្លាំងជាតិសូម៉ាលីលោក Odawa Yusuf Rage មានប្រសាសន៍ថាប្រតិបត្តិការនេះបានបន្តក្នុងរយៈពេលពីរថ្ងៃចុងក្រោយ ហើយកងទ័ពដណ្តើមបានការកាន់កាប់ភូមិជាច្រើននៅក្នុងតំបន់។
លោក Rage មានប្រសាសន៍បន្ថែមថា៖ “នៅក្នុងប្រតិបត្តិការនេះ យើងបានសម្លាប់សមាជិកក្រុមជ្រុលនិយមអាល់សាបចំនួន០៤នាក់ដោយនៅក្នុងនោះមានមេដឹកនាំជាន់ខ្ពស់ម្នាក់ទទួលបន្ទុកក្រុង Basra សម្រាប់ក្រុមសកម្មប្រយុទ្ធ ហើយកងកម្លាំងរបស់យើងបានបំផ្លាញទីតាំងតុលាការដែលគ្រប់គ្រងដោយក្រុមសកម្មប្រយុទ្ធ” ។
មេបញ្ជាការរូបនោះបន្តថា កងទ័ពជាតិសូម៉ាលីនឹងបង្កើនប្រតិបត្តិការយោធាប្រឆាំងនឹងក្រុមសកម្មប្រយុទ្ធនៅរយៈពេលប៉ុន្មានថ្ងៃខាងមុខ។ ស្របពេលជាមួយគ្នានេះដែរ មន្ត្រីសន្តិសុខ ០៦នាក់ស្លាប់ខណៈចំនួន ០៤នាក់ផ្សេងទៀតបានរងរបួសនៅក្នុងការវាយប្រហារពីគ្រាប់មីនលើរថយន្តរបស់ពួកគេនៅជាយក្រុងនៃក្រុងបាឡាដនៅថ្ងៃពុធ។
អ្នកនាំពាក្យប៉ូលិសលោក Dhame Sadik Adan និយាយថា រថយន្តដែលជាកម្មសិទ្ធិរបស់ស្នងការស្រុក Bal’ad រងការវាយប្រហារពីគ្រាប់បែកនៅតាមដងផ្លូវក្រោយពីមានការវាយប្រហារនៅក្នុងទីប្រជុំជនដែលមានចម្ងាយប្រហែល៣០គីឡូម៉ែត្រខាងជើងទីក្រុង Mogadishu ។
លោក Adan និយាយថា “លោកស្នងការស្រុកបានរួចផុតពីការវាយប្រហារដោយសារគាត់មិននៅក្នុងរថយន្ត ប៉ុន្តែអង្គរក្សរបស់គាត់ចំនួន០៦នាក់ស្លាប់។ ក្រុមបះបោរបានបង្កើនការវាយប្រហាររបស់ពួកគេប្រឆាំងនឹងរដ្ឋាភិបាល និងបេសកកម្មសហភាពអាហ្វ្រិកនៅមូលដ្ឋានទ័ពសូម៉ាលីនៅទូទាំងភាគខាងត្បូង និងកណ្តាលនៃតំបន់ Horn នៃទ្វីបអាហ្វ្រិកដោយធ្វើការវាយឆ្មក់ និងដាំគ្រាប់មីន៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៧ ខែតុលា ឆ្នាំ២០២០
