ប៉ូលិសនៅក្នុងតំបន់និយាយនៅថ្ងៃអង្គារថា សមាជិកកម្លាំងសន្តិសុខចំនួន០៤នាក់ និងសមាជិកសកម្មប្រយុទ្ធតាលីបង់ចំនួន១០នាក់ស្លាប់នៅក្នុងហេតុការណ៍ប៉ះទង្គិចប្រដាប់អាវុធនៅខេត្ត Baghlan ភាគខាងជើងប្រទេសអាហ្វហ្គានីស្ថាននៅយប់ថ្ងៃច័ន្ទ។
នៅក្នុងចំណោមនោះក៏មានសមាជិកសន្តិសុខចំនួន ០៣នាក់ និងសកម្មប្រយុទ្ធចំនួន១២ នាក់រងរបួសនៅក្នុងហេតុការណ៍ប៉ះទង្គិចគ្នានោះផងដែរ។
ការប៉ះទង្គិចគ្នាផ្ទុះឡើងនៅក្នុងតំបន់ Hadbakhshi និង Baghlan-e-Markazi ក្រោយពីក្រុមសកម្មប្រយុទ្ធបានធ្វើការវាយប្រហារលើទីតាំងរបស់កងកម្លាំងសន្តិសុខ។ អ្នកនាំពាក្យប៉ូលិសខេត្តលោក Ahmad Jawid Basharat មានប្រសាសន៍នៅក្នុងសេចក្តីថ្លែងការណ៍មួយថា បុគ្គលិកសន្តិសុខបានដាក់ពង្រាយនៅប៉ុស្តិ៍ត្រួតពិនិត្យគោលដៅបានធ្វើការឆ្លើយតបយ៉ាងមានប្រសិទ្ធិភាព ដោយអាចបង្ខំឲ្យសកម្មប្រយុទ្ធរត់ចេញពីកន្លែងកើតហេតុ។
សូមបញ្ជាក់ផងដែរថា នៅក្នុងរយៈពេលប៉ុន្មានឆ្នាំថ្មីៗនេះ ខេត្តនេះគឺជាទីតាំងមួយដែលរងការប៉ះទង្គិចគ្នាយ៉ាងខ្លាំងនៅរយៈពេលប៉ុន្មានឆ្នាំថ្មីៗនេះ នៅពេលដែលសមាជិកសកម្មប្រយុទ្ធតាលីបង់បានព្យាយាមរឹបអូសយកដីធ្លីបន្ថែម និងពង្រឹងទីតាំងរបស់ពួកគេ។
ប្រែសម្រួល៖ ប៉ោក លក្ខិណា
ប្រភពព័តមាន Xinhua ចុះផ្សាយថ្ងៃទ២៤ ខែ១១ ឆ្នាំ២០២០
