ភ្នាក់ងារសារព័ត៌មានរដ្ឋ SANA រាយការណ៍ថា នៅថ្ងៃពុធ ទី២៧ ខែមករា កងទ័ពស៊ីរីសម្លាប់សមាជិកសកម្មប្រយុទ្ធចំនួន៨នាក់ខណៈរយៈពេលថ្មីៗនេះសមាជិកសកម្មប្រយុទ្ធបានវាយប្រហារទៅលើរថយន្តក្រុងយោធា និងជនស៊ីវិលនៅលើតំបន់វាលខ្សាច់ភាគខាងកើតខេត្ត Deir al-Zour។
សារព័ត៌មាន SANA ដកស្រង់សម្តីយោធាដែលមានសេចក្តីថា ក្រោយពីមានប្រតិបត្តិការច្បាស់លាស់ កងកម្លាំងស៊ីរីនៅក្នុងខេត្ត Deir al-Zour បានតាមដានលើសមាជិកក្រុមភេរវជនដែលវាយប្រហារទៅលើបុគ្គលិក ជនស៊ីវិល និងយោធានៅតាមផ្លូវរវាងខេត្ត Deir al-Zour និងទីក្រុង Palmyra។
របាយការណ៍លើកឡើងថា បច្ចុប្បន្នលើផ្លូវពីខេត្ត Palmyra និង Deir al-Zour មានសុវត្ថិភាពទាំងស្រុង។ យ៉ាងណាមិញ នៅរយៈពេលថ្មីៗនេះ សមាជិករដ្ឋអ៊ីស្លាម (IS) បង្កើនការវាយប្រហារទៅលើផ្លូវនៅតំបន់វាលខ្សាច់ដោយសម្លាប់ទាហាន និងជនស៊ីវិលជាច្រើននាក់។
នៅដើមសប្តាហ៍នេះផងដែរ ឧទ្ទាម IS ធ្វើការវាយឆ្មក់លើតំបន់វាលខ្សាច់ដោយបានសម្លាប់ទាហានចំនួន៣នាក់។ លើសពីនេះ នៅថ្ងៃទី៣១ ខែធ្នូ ឆ្នាំ២០២០ សមាជិក IS ក៏ធ្លាប់សម្លាប់មនុស្សចំនួន២៥នាក់នៅលើតំបន់វាលខ្សាច់តែមួយនោះផងដែរ។
នៅក្នុងសេចក្តីថ្លែងការណ៍លើកឡើងនៅថ្ងៃពុធ សារព័ត៌មាន SANA ចុះផ្សាយថា កងទ័ពស៊ីរីបាន និងកំពុងតាមដានលើក្រុមដែលទទួលខុសត្រូវចំពោះការវាយប្រហារនេះ។
គួររំលឹកផងដែរថា ក្រោយពីបានបាត់បង់តំបន់សំខាន់ៗនៅភាគខាងជើង និងភាគឥសាននៃប្រទេសស៊ីរី សមាជិក IS បានឈរជើងនៅតំបន់វាលខ្សាច់ដែលលាតសន្ធឹងពីខេត្ត Deir al-Zour និងខេត្ត Homs៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៧ ខែមករា ឆ្នាំ២០២០
