បាតុកររាប់រយនាក់បានប្រមូលផ្តុំគ្នានៅរដ្ឋធានីថៃកាលពីថ្ងៃសៅរ៍ (៦ មីនា) ដើម្បីទាមទារអោយអាជ្ញាធរដោះលែងមេដឹកនាំបាតុករមួយចំនួនចេញពីពន្ធនាគារដោយប្រឆាំងនឹងបទបញ្ជាមួយកាលពីថ្ងៃសុក្រហាមឃាត់ការប្រមូលផ្តុំជាសាធារណៈនៅក្នុងទីក្រុងនេះ។
ចលនាបាតុកម្មដឹកនាំដោយយុវជនបានកើតឡើងកាលពីឆ្នាំមុនដោយអំពាវនាវឱ្យលោកនាយករដ្ឋមន្ត្រីPrayut Chan-o-cha លាលែងពីតំណែងជាអតីតមេដឹកនាំរបបយោធានិងធ្វើកំណែទម្រង់របបរាជានិយមដែលមានអំណាចនេះ។ តុលាការថៃបានបដិសេធសំណើថ្មីៗដែលសុំនៅក្រៅឃុំសម្រាប់មេដឹកនាំបាតុករដែលជាប់ពន្ធនាគារផងដែរ។ ក្រុមអ្នកតវ៉ាបានស្រែកដោយសាមគ្គីភាពនៅពេលពួកគេប្រមូលផ្តុំគ្នានៅមុខតុលាការព្រហ្មទណ្ឌដែលព័ទ្ធជុំវិញដោយលួសបន្លា។ គេអាចឃើញឡានដឹកទឹកមួយនៅខាងក្រោយខ្លោងទ្វារតុលាការផងដែរ។
ក្រុមអ្នកតវ៉ាជាច្រើននាក់បានដុតរូបព្រះមហាក្សត្រនៅក្នុងការជួបជុំនេះផងដែរ។ ក្រុមដាច់ដោយឡែកផ្សេងទៀតក៏បានដឹកនាំការតវ៉ាពីរផ្សេងទៀតនៅទីតាំងផ្សេងគ្នាក្នុងទីក្រុងបាងកកផងដែរ។ នៅព្រឹកថ្ងៃសៅរ៍នេះ ប៉ូលិសបានព្រមានក្រុមអ្នកតវ៉ាថាពួកគេប្រថុយនឹងការចាប់ខ្លួន ហើយប៉ូលិសអាចនឹងប្រើវិធានការណ៍តឹងរ៉ឹងជាងមុនថែមទៀត។ លោក Piya Tavichai ស្នងការរងនៃការិយាល័យប៉ូលិសក្រុងបាងកកបានប្រាប់សន្និសីទសារព័ត៌មានថា “ការតវ៉ាគឺខុសច្បាប់។ អ្នកដែលចូលរួមឬអញ្ជើញអ្នកដទៃទៀតឱ្យចូលរួមគឺកំពុងបំពានច្បាប់”៕
សម្រួល៖ សុផា
