សេចក្តីប្រកាសពី ការត្រឡប់ទៅសាលាវិញបានធ្វើឱ្យស្ត្រីអាហ្វហ្គានីស្ថានមានការភ័យខ្លាច ស្របពេលដែលមានការរឹតបន្តឹងយ៉ាងតឹងរ៉ឹងរបស់ក្រសួងអប់រំឧត្តមសិក្សាតាលីបង់។ ការរឹតបន្តឹងបែបនេះ រួមមានទាំងការបំបែកគ្នារវាងបុរស និងស្ត្រី ហើយស្ត្រីត្រូវស្លៀករ៉ូបអាបាយ៉ា និងបិទមុខ។ ស្ត្រីត្រូវបញ្ចប់មេរៀនរបស់ពួកគេឱ្យលឿនជាងបុរស 5 នាទីផងដែរ ដើម្បីបញ្ឈប់ពួកគេពីការប្រមូលផ្តុំគ្នានៅខាងក្រៅ និងស្នាក់នៅក្នុងបន្ទប់រង់ចាំរហូតដល់សិស្សប្រុសគ្នាគេចេញពីអាគារ។
អតីតឯកអគ្គរដ្ឋទូតសហរដ្ឋអាមេរិកដើម្បីបញ្ហាស្ត្រីសកលលោក និងសមាជិកក្រុមប្រឹក្សាភិបាលនៃសម្ព័ន្ធ Vandenberg លោក Kelley Eckels Currie បានប្រាប់ Fox News ថា ពួកតាលីបង់មាន “ផ្នត់គំនិតមជ្ឈិមសម័យចំពោះស្ត្រី” ។
Currie បានពន្យល់ “មុនពេលដែលអាមេរិកចូលមក និងបណ្តេញពួកតាលីបង់ចេញក្រោយថ្ងៃទី 9/11 ស្ត្រីអាហ្វហ្គានីស្ថានត្រូវបានបង្ខំឱ្យស្លៀកពាក់ burqa នៅទីសាធារណៈ ពួកគេមិនអាចទៅកន្លែងណាដោយគ្មានបុរសទៅជាមួយ និងបង្ខំឱ្យរៀបការមុនអាយុ ហើយមិនត្រូវបានអនុញ្ញាតឱ្យចូលសាលារៀន” ។
Currie បានប្រាប់ថា ការអះអាងរបស់ពួកតាលីបង់បានផ្លាស់ប្តូរ ក្នុងអំឡុងពេលនៃការចូលរួមជាមួយសហរដ្ឋអាមេរិក គឺជាការកុហក។ Currie បានបន្ត “អ្នកដែលបានធ្វើការនៅអាហ្វហ្គានីស្ថានដឹងថា ពួកគេបញ្ជូនកូនស្រីរបស់ពួកគេទៅសាលារៀននៅ Doha មិនមែនមានន័យថាពួកគេគិតថាស្ត្រីអាហ្វហ្គានីស្ថានដែលនៅសល់គួរតែត្រូវបានអនុញ្ញាតឱ្យទទួលបានការអប់រំនោះទេ”។
Anita McBride អតីតប្រធានបុគ្គលិកចំពោះស្ត្រីទីមួយ Laura Bush និងជានាយកប្រតិបត្តិនៅសាកលវិទ្យាល័យអាមេរិកបានចែករំលែកអារម្មណ៍ស្រដៀងគ្នា។ McBride បាននិយាយថា “គ្មានអ្វីបង្ហាញពីទំនុកចិត្តណាមួយដែលថាពួកតាលីបង់មានភាពខុសប្លែកពីពេលមុនឡើយ ទាក់ទងទៅនឹងចិត្តគំនិតរបស់ពួកគេ ទស្សនៈរបស់ពួកគេចំពោះស្ត្រី និងតួនាទីរបស់ពួកគេនៅក្នុងសង្គម”។
លោក McBride បានបន្ថែមថា ទង្វើបច្ចុប្បន្នចំពោះស្ត្រីនៅក្នុងប្រទេសអាហ្វហ្គានីស្ថាន គឺអាចព្យាករណ៍បានថា “ពួកតាលីបង់ គឺជាមេ PR ពីព្រោះពួកគេអស់សង្ឃឹមក្នុងការទទួលបានភាពស្របច្បាប់នៅលើឆាកពិភពលោក។ ពួកគេព្រមានថា សេដ្ឋកិច្ចស្ថិតក្នុងស្ថានភាពអស់សង្ឃឹមដែលមិនអាចបម្រើប្រជាជនអាហ្វហ្គានីស្ថានបាន។”
មនុស្សមួយចំនួនដែលមានសំណាងអាចរត់ភៀសខ្លួនទៅសហរដ្ឋអាមេរិក បាននិយាយថាស្ត្រីលែងមានសិទ្ធិនៅក្នុងសង្គមអាហ្វហ្គានីស្ថានទៀតហើយ។
អ្នកប្រែសម្រួល៖ ងួន ណារិទ្ធ
ប្រភពព័ត៌មានពី foxnews ចេញផ្សាយថ្ងៃទី ១៣ ខែកុម្ភៈ ឆ្នាំ២០២២
