JERUSALEM (AP): កាលពីថ្ងៃអាទិត្យ ខ្មាន់កាំភ្លើងជនជាតិអារ៉ាប់ពីរនាក់ បានសម្លាប់មនុស្ស ២នាក់ និង ៤នាក់ផ្សេងទៀតរបួសក្នុងហេតុការបាញ់ប្រហារមួយនៅកណ្តាលប្រទេសអ៊ីស្រាអែល មុនពេលពួកគេត្រូវបានសម្លាប់ដោយប៉ូលិស នេះបើយោងតាមប៉ូលិស និងមន្រ្តីពេទ្យ។
វាជាការវាយប្រហារជាតិសាសន៍លើកទីពីរដែលធ្វើឡើងដោយក្រុមជនប្រដាប់អាវុធអារ៉ាប់ក្នុងទីក្រុងអ៊ីស្រាអែលក្នុងរយៈពេលមិនដល់មួយសប្តាហ៍ផង។ កាលពីថ្ងៃអង្គារ អ្នកវាយប្រហារតែម្នាក់ឯងដែលទទួលបានការបំផុសគំនិតដោយក្រុមសកម្មប្រយុទ្ធរដ្ឋអ៊ីស្លាម បានសម្លាប់មនុស្ស ៤នាក់នៅក្នុងការចាក់សម្លាប់យ៉ាងកំរោលមួយនៅភាគខាងត្បូងប្រទេសអ៊ីស្រាអែល ហើយក្រោយមកឧក្រិដ្ឋជននេះត្រូវបានអ្នកធ្វើដំណើរតាមផ្លូវសម្លាប់។
មន្ត្រីសន្តិសុខអ៊ីស្រាអែលនិយាយថាខ្មាន់កាំភ្លើងគឺជាអ្នកគាំទ្រក្រុមជ្រុលនិយមរដ្ឋឥស្លាម ដែលគាត់ជាពលរដ្ឋអារ៉ាប់មកពីភាគខាងជើងប្រទេសអ៊ីស្រាអែល។ ប៉ូលិសមិនបានបញ្ចេញឈ្មោះពួកគេទេ ព្រោះស្ថិតក្នុងការស៊ើបអង្កេត។
ការវាយប្រហារនេះកើតឡើងនៅមុនពេលបុណ្យរ៉ាម៉ាដាន ហើយព្រមទាំងបានគំរាមកំហែងជះឥទ្ធិពលអាក្រក់ដល់ការជួបជុំរបស់រដ្ឋមន្ត្រីការបរទេសនៅវាលខ្សាច់ Negev ដែលជាកន្លែងរៀបចំកិច្ចព្រមព្រៀងនុយក្លេអ៊ែរអ៊ីរ៉ង់ដែលគេរំពឹងថាជាកិច្ចការសំខាន់ដែលត្រូវពីភាក្សា។ នាយករដ្ឋមន្ត្រី Naftali Bennett បានប្រញាប់ប្រញាល់ទៅកន្លែងកើតហេតុ។
រដ្ឋមន្ត្រីការបរទេសអ៊ីស្រាអែល លោក Yair Lapid បានពន្យល់ដល់សមភាគីរបស់លោកមកពីសហរដ្ឋអាមេរិក និងប្រទេសអារ៉ាប់ទាំងបួន ដែលបានថ្កោលទោសការវាយប្រហារនេះ។ Lapid បានចេញសេចក្តីថ្លែងការណ៍មួយដោយហៅវាថា “សាហាវឃោរឃៅ” និង “ការប៉ុនប៉ងដោយពួកជ្រុលនិយមហឹង្សា ដើម្បីធ្វើអោយភ័យខ្លាច និងធ្វើឲ្យខូចរបៀបរៀបចំជីវិតនៅទីនេះ” ។
មិនមានការអះអាងភ្លាមៗពីការទទួលខុសត្រូវនៃការវាយប្រហារនោះទេ។ ប៉ុន្តែក្រុម Hamas ដែលជាក្រុមសកម្មប្រយុទ្ធរដ្ឋអ៊ីស្លាម គ្រប់គ្រងតំបន់ហ្គាហ្សា បានសរសើរការវាយប្រហារនេះថាជា “ប្រតិបត្តិការវីរភាព”។
វីដេអូក្នុងកាមេរ៉ាសុវត្ថិភាពដែលបង្ហោះលើប្រព័ន្ធផ្សព្វផ្សាយអ៊ីស្រាអែល បានបង្ហាញពីបុរសមានពុកចង្កាពីរនាក់បានលេចមុខបើកការបាញ់ប្រហារក្នុងទីក្រុង Hadera មុនពេលពួកគេត្រូវបានគេបាញ់សម្លាប់។ មន្ត្រីអ៊ីស្រាអែលម្នាក់បាននិយាយថា សមាជិកពីរនាក់នៃអង្គភាពប្រឆាំងភេរវកម្មរបស់ប៉ូលីសព្រំដែនអ៊ីស្រាអែល កំពុងនៅក្នុងភោជនីយដ្ឋានមួយជិតការវាយប្រហារនោះ បានរត់ចេញមកក្រៅ ហើយបានបាញ់សម្លាប់អ្នកវាយប្រហារនោះ។
សេវាសង្គ្រោះរបស់អ៊ីស្រាអែល MADA បានបញ្ជាក់ពីការស្លាប់របស់បុរសម្នាក់ និងស្ត្រីម្នាក់ ហើយបាននិយាយថា មនុស្ស ៤នាក់រងរបួស និងមានពីរនាក់របួសធ្ងន់ធ្ងរ។ គេបានបញ្ចេញវីដេអូបង្ហាញពីរថយន្តប៉ូលិស និងរថយន្តសង្គ្រោះជាច្រើនគ្រឿងនៅកន្លែងកើតហេតុ។
បន្ទាប់ពីការវាយប្រហារកាលពីសប្តាហ៍មុន មន្ត្រីអ៊ីស្រាអែលបានសម្តែងការព្រួយបារម្ភអំពីការកើនឡើងនៃអំពើហិង្សាដែលអាចកើតមាននៅមុនថ្ងៃបុណ្យរ៉ាម៉ាដាន នៅពេលដែលភាពតានតឹងផ្នែកសាសនាត្រូវបានកើនឡើងជាញឹកញាប់។ កាលពីឆ្នាំមុន ការប៉ះទង្គិចគ្នារវាងប៉ូលិសអ៊ីស្រាអែល ជាមួយបាតុករមូស្លីមក្នុងអំឡុងបុណ្យរ៉ាម៉ាដានបានផ្ទុះសង្រ្គាមរយៈពេល ១១ថ្ងៃរវាងអ៊ីស្រាអែល និងអ្នកគ្រប់គ្រងក្រុមហាម៉ាសនៅក្នុងតំបន់ហ្គាហ្សា។
អ្នកប្រែសម្រួល៖ ងួន ណារិទ្ធ
ប្រភពព័ត៌មានពី usnews ចេញផ្សាយថ្ងៃទី២៧ ខែមីនា ឆ្នាំ២០២២
