បុរសនៅរដ្ឋផ្លរីដា (Florida) ដែលបានសន្យាស្មោះស្ម័គ្រជាមួយ ISIS និងបានចែកចាយវីដេអូ អំពីការបង្កើតគ្រឿងផ្ទុះត្រូវបានកាត់ទោសឱ្យជាប់ពន្ធនាគាររយៈពេល ២០ ឆ្នាំ ក្នុងសប្តាហ៍នេះ។
រ៉ូមីអូ ហ្សាវីយឺ ឡែងវ័ន (Romeo Xavier Langhorne) បានសារភាពកំហុស ចំពោះការប៉ុនប៉ងផ្តល់សម្ភារៈជំនួយដល់ ISIS កាលពីឆ្នាំមុន បន្ទាប់ពីការចាប់ខ្លួនរបស់គាត់នៅឆ្នាំ 2019 ។
បុរសអាយុ 32 ឆ្នាំដែលមានមូលដ្ឋាននៅ St. Augustine ប៉ុន្តែនៅជាប់ទីក្រុងរ៉ូអាណូកា (Roanoka) រដ្ឋ Virginia ពីដំបូង បានសន្យាភក្ដីភាពរបស់គាត់ចំពោះ ISIS នៅក្នុងឆ្នាំ 2014 និងបានបញ្ជាក់ឡើងវិញនូវការគាំទ្ររបស់គាត់ចំពោះអង្គការភេរវករនៅក្នុងឆ្នាំ 2018 និង 2019 ។
លោក ឡែងវ័ន(Langhorne) បានប្រាប់ភ្នាក់ងារ FBI ថាគាត់ចង់បង្កើតវីដេអូផលិតគ្រាប់បែកនេះ ដើម្បី “ផ្តល់សព្វាវុធដល់ពួក ISIS និងអ្នកផ្សេងទៀត ជាមួយនឹងការណែនាំពីរបៀបបង្កើត triacetone triperoxide (TATP) និងប្រើវាសម្រាប់គោលបំណងដែលទាក់ទងនឹងភេរវកម្មដើម្បីគាំទ្រ ISIS”។ នេះបើយោងតាមការិយាល័យមេធាវីសហរដ្ឋអាមេរិកនៃរដ្ឋផ្លរីដា។
FBI បានធ្វើវីដេអូ ការណែនាំពីរបៀបធ្វើគ្រឿងផ្ទុះរបស់ លោកឡែងវ័ន(Langhorne) ជាមួយនឹងរូបមន្ត អសកម្មសម្រាប់ TATP ដែលវាពិតជាមិនផ្ទុះ ហើយឡែងវ័ន(Langhorne) បានបង្ហោះវាទៅក្នុងគេហទំព័រមួយក្នុងខែវិច្ឆិកា ឆ្នាំ 2019 ហើយគាត់ត្រូវបានគេចាប់ខ្លួននាប៉ុន្មានថ្ងៃក្រោយមក។
ភ្នាក់ងារពិសេសរបស់ FBI Jacksonville ទទួលបន្ទុក Sherri E. Onks បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថា “ឆន្ទៈរបស់បុគ្គលដ៏គ្រោះថ្នាក់ម្នាក់នេះ ដើម្បីបង្កមហន្តរាយដល់ជនជាតិអាមេរិកស្លូតត្រង់ គឺតែងតែពិតប្រាកដ ប៉ុន្តែតាមរយៈការខិតខំប្រឹងប្រែង និងការប្តេជ្ញាចិត្ត របស់ក្រុមការងារភេរវកម្មរួម FBI Jacksonville បានបង្អាក់ផែនការរបស់គាត់ដោយជោគជ័យនៅដំណាក់កាលដំបូង និងបញ្ជៀសការគំរាមកំហែងចំពោះសុវត្ថិភាពរបស់សហគមន៍យើង” ។
អ្នកប្រែសម្រួល៖ ងួន ណារិទ្ធ
ប្រភពព័ត៌មានពី foxnews ចេញផ្សាយថ្ងៃទី ១០ ខែកក្កដា ឆ្នាំ២០២២
