បុរស​ម្នាក់​ត្រូវ​បានចាប់ខ្លួន​នៅ​ចក្រភព​អង់គ្លេស​ដោយ​ចោទប្រកាន់​ថា​ជា​ផ្នែក​នៃ​ក្រុម ISIS “Beatles”

0

ទីក្រុងឡុងដ៍ៈ ប៉ូលីស​ក្រុង ម៉េត្រូប៉ូលីថេន(Metropolitan) បាន​និយាយ​ក្នុង​សេចក្តីថ្លែងការណ៍​មួយ ថាកាលពី​ថ្ងៃ​ពុធ ប៉ូលិស​ក្នុង​ប្រទេស​អង់គ្លេស​បាន​ចាប់​ខ្លួន​បុរស​អាយុ ៣៨ឆ្នាំ​ម្នាក់ ​នៅ​អាកាសយានដ្ឋាន លូតុន(Luton) ក្រោម​ការ​ចោទ​ប្រកាន់ពី ​​អំពើភេរវកម្ម។

តាមសារពត៌មាន BBC បានរាយការណ៍ថា បុរសដែលត្រូវបានចាប់ខ្លួនគឺឈ្មោះ អាណេ ដេវីស(Aine Davis) ដែលត្រូវបានចោទប្រកាន់ថា ជាផ្នែកនៃកោសិការក្រុមរដ្ឋអ៊ីស្លាម (ISIS) ដែលបានសម្លាប់ចំណាប់ខ្មាំង។ បុរសបួននាក់ដែលនៅជាមួយក្រុម ISIS ក្នុងប្រទេសស៊ីរី ត្រូវបានគេដាក់រហស្សនាមថា “The Beatles” ដោយចំណាប់ខ្មាំង ព្រោះតែការនិយាយភាសារអង់គ្លេសរបស់ពួកគេ។

សេចក្តីថ្លែងការណ៍របស់ប៉ូលីស មិនបានកំណត់អត្តសញ្ញាណជនដែលត្រូវបានចាប់ខ្លួននោះទេ។ គេបាននិយាយថាបុរសម្នាក់ត្រូវបានចាប់ខ្លួន “ពាក់ព័ន្ធនឹងបទល្មើសនៅក្រោមផ្នែកទី 15, 17 និង 57 នៃច្បាប់ភេរវកម្មឆ្នាំ 2000 ហើយត្រូវបានគេនាំទៅស្ថានីយ៍ប៉ូលីសភាគខាងត្បូងទីក្រុងឡុងដ៍ ដែលបច្ចុប្បន្នគាត់ជាប់ក្នុងការឃុំឃាំងរបស់ប៉ូលីស” ។

សារពត៌មាន BBC បានរាយការណ៍ថា ដេវីស(Davis) មកពីទីក្រុងឡុងដ៍ បានហោះចូលអាកាសយានដ្ឋាន Luton បន្ទាប់ពីគាត់ត្រូវបានដោះលែងពីពន្ធនាគារក្នុងប្រទេសទួរគី ជាទីកន្លែងដែលគាត់កំពុងជាប់ពន្ធនាគាររយៈពេលប្រាំពីរឆ្នាំកន្លះ ដោយការជាប់ទោសពីបទអំពើភេរវកម្ម។

កោសិកាក្រុមរដ្ឋអ៊ីស្លាម ទទួលបានការចាប់អារម្មណ៍ពីអន្តរជាតិបន្ទាប់ពីបានចេញផ្សាយវីដេអូនៃឃាតកម្មក្នុងឆ្នាំ 2012 ដល់ឆ្នាំ 2015 នៃពលរដ្ឋអាមេរិកបួននាក់ – អ្នកកាសែត ជេម ហ្វូលី(James Foley) និងស្ទេវិន សូតឡូស (Steven Sotloff) រួមទាំងបុគ្គលិកផ្តល់ជំនួយ កាលា ម៊ូលឺ(Kayla Mueller) និងភីធឺ កាសិក(Peter Kassig) ។ ជនរងគ្រោះផ្សេងទៀតរួមមានបុគ្គលិកផ្តល់ជំនួយជនជាតិអង់គ្លេសពីរនាក់ និងអ្នកកាសែតជប៉ុនពីរនាក់។

អ្នកប្រែសម្រួល៖ ងួន ណារិទ្ធ

LEAVE A REPLY

Please enter your comment!
Please enter your name here