មន្ទីរបញ្ចកោណបានប្រកាសកាលពីថ្ងៃពុធថា កងកម្លាំងប្រជាធិបតេយ្យស៊ីរីដែលគាំទ្រដោយសហរដ្ឋអាមេរិក បានចាប់ខ្លួនភេរវករ ISIS ជាច្រើននាក់ដែលកំពុងលាក់ខ្លួនក្នុងជំរុំជនភៀសខ្លួន អាហូល(al-Hol) ។
កងកម្លាំងប្រជាធិបតេយ្យស៊ីរី (SDF) បានធ្វើការចាប់ខ្លួននៅក្នុងប្រតិបត្តិការរបស់ខ្លួនជាបន្តបន្ទាប់នៅទូទាំងជំរុំ ដោយបំផ្លាញ់បណ្តាញភេរវករដែលកំពុងប្រតិបត្តិការនៅទីនោះ និងទីកន្លែងផ្សេងទៀតក្នុងប្រទេសស៊ីរី។ ក្រុមភេរវករ ISIS បានវាយប្រហារទៅលើគោលដៅរបស់អាមេរិក និងសម្ព័ន្ធមិត្តក្នុងប៉ុន្មានសប្តាហ៍ថ្មីៗនេះ។
លោក កូឡូនែល ចូប៊ូស៊ីណូ(Colonel Joe Buccino) នាយកផ្នែកទំនាក់ទំនងរបស់ CENTCOM បាននិយាយនៅក្នុងសេចក្តីថ្លែងការណ៍មួយថា “ប្រតិបត្តិការនេះនឹងធ្វើឱ្យជំរុំកាន់តែមានសុវត្ថិភាពជាងមុនសម្រាប់អ្នកដែលកំពុងរស់នៅទីនោះ ឬចង់ត្រឡប់ទៅប្រទេសដើមរបស់ពួកគេវិញ ប៉ុន្តែមិនអាចធ្វើដូច្នេះបានទេ” ។
លោកបានបន្ថែមថា ” កងកម្លាំងប្រជាធិបតេយ្យស៊ីរី (SDF) នឹងបន្តកិច្ចខិតខំប្រឹងប្រែងរបស់ខ្លួនដើម្បីលុបបំបាត់ការគំរាមកំហែងរបស់ ISIS ប៉ុន្តែវានៅតែជាសារៈសំខាន់ ដែលសហគមន៍អន្តរជាតិគាំទ្រកិច្ចខិតខំប្រឹងប្រែងនេះតាមរយៈការធ្វើមាតុភូមិនិវត្តន៍” ។
ការចាប់ខ្លួននេះកើតឡើងប៉ុន្មានសប្តាហ៍បន្ទាប់ពីយន្តហោះគ្មានមនុស្សបើក បានហោះបំផ្ទុះចូលទៅក្នុងមូលដ្ឋានទ័ពអាមេរិកនៅភាគខាងត្បូងប្រទេសស៊ីរី កាលពីខែសីហាកន្លងមក។
ទោះយ៉ាងណា កងកម្លាំងអាមេរិក និងសម្ព័ន្ធមិត្តនៅបរិវេណ អាតាន(al-Tanf) មិនបានទទួលរងរបួស ឬការខូចខាតពីការវាយប្រហារនោះទេ។ ទាហានដែលឈរជើងនៅមូលដ្ឋានបានបាញ់ទម្លាក់យន្តហោះគ្មានមនុស្សបើកមួយគ្រឿងមុនពេលវាអាចចូលក្នុងបរិវេណនោះ។ ចំណែកមួយទៀតបានហោះចូលក្នុងអគារមួយហើយបំផ្ទុះ ប៉ុន្តែមិនបណ្តាលឱ្យមានមនុស្សរងរបួសឡើយ ។
យោធភូមិភាគអាមេរិកនៅ អាតាន(al-Tanf) ធ្វើការល្បាតជាញឹកញាប់ជាមួយកងកម្លាំងចម្រុះប្រឆាំងនឹងពួកសកម្មប្រយុទ្ធរដ្ឋអ៊ីស្លាម។
ក្រោយមក សហរដ្ឋអាមេរិកបានធ្វើការវាយប្រហារតាមអាកាសសងសឹកប្រឆាំងនឹងពួកជ្រុលនិយមដែលជាគោលដៅក្នុងការឆ្លើយតបនឹងការវាយប្រហារនេះ។
លោក ប៊ូស៊ីណូ បាននិយាយក្នុងសេក្តីថ្លែងការណ៍មួយនៅពេលនោះថា៖ ការវាយប្រហារតាមអាកាសក្នុងថ្ងៃនេះ គឺចាំបាច់ដើម្បីការពារ និងការពារបុគ្គលអាមេរិក។ សហរដ្ឋអាមេរិក បានទទួលយកការតាំងចិត្ត ក្នុងគោលបំណងដើម្បីកំណត់ហានិភ័យនៃការកើនឡើង និងកាត់បន្ថយហានិភ័យនៃការស្លាប់បាត់បង់ ជីវិត។
អ្នកប្រែសម្រួល៖ ងួន ណារិទ្ធ
ប្រភពព័ត៌មានពី foxnews ចេញផ្សាយថ្ងៃទី៧ ខែកញ្ញា ឆ្នាំ២០២២
