ប្រទេសប៉ាគីស្ថាន៖ យោធាប៉ាគីស្ថានបាននិយាយនៅថ្ងៃអាទិត្យថា ក្រុមភេរវករ៨នាក់ និងសមាជិកសន្តិសុខ២នាក់ស្លាប់ក្នុងប្រតិបត្តិការយោធាចំនួន២លើកដាច់ដោយឡែកពីគ្នានៅខេត្ត ខាយប័រ ផាកថុនវ៉ា ភាគពាយ័ព្យប្រទេសប៉ាគីស្ថាន ក្នុងរយៈពេល៣ថ្ងៃកន្លងមកនេះ។
បណ្តាញទំនាក់ទំនងសាធារណៈអន្តរសេវាកម្មហៅកាត់ថា (ISPR) ដែលជាដៃគូរបស់ប្រព័ន្ធផ្សព្វផ្សាយកងទ័ពប៉ាគីស្ថានបានលើកឡើងនៅក្នុងសេចក្តីថ្លែងការណ៍មួយថា ប្រតិបត្តិការដោយមានមូលដ្ឋានលើរបាយការណ៍ស៊ើបការណ៍សម្ងាត់ត្រូវបានធ្វើឡើងនៅក្នុងតំបន់បាកា ខែល នៃស្រុកបាននូ។
ក្នុងអំឡុងពេលប្រតិបត្តិការ កម្លាំងទ័ពបានវាយឆ្មក់ចូលទីតាំងរបស់ក្រុមភេរវករយ៉ាងមានប្រសិទ្ធភាព សម្លាប់ភេរវករបានចំនួន៥នាក់ និងបង្ករបួសស្នាមដល់៩នាក់ផ្សេងទៀត។
នៅក្នុងប្រតិបត្តិការមួយផ្សេងទៀត ភេរវករ៣នាក់ត្រូវបានសម្លាប់ និង២នាក់ផ្សេងទៀតត្រូវកម្លាំងសន្តិសុខចាប់ឃុំខ្លួននៅតំបន់ស្ហាហ្កាយ នៃខេត្តខាយប័រ។
ទាហានម្នាក់បាត់បងជីវិតក្នុងប្រតិបត្តិការទី១ និងមន្ត្រីថ្នាក់អនុសេនីយ៍ម្នាក់បានពលីជីវិតក្នុងប្រតិបត្តិការលើកទី២។
ISPR និយាយថា ភេរវករដែលស្លាប់ទាំងនោះធ្លាប់ចូលរួមយ៉ាងសកម្មក្នុងសកម្មភាពភេរវកម្មប្រឆាំងប្រឆាំងនឹងកងកម្លាំងសន្តិសុខ និងជនស៊ីវិលស្លូតត្រង់ ព្រមទាំងមានការជំរិតទារប្រាក់ផងដែរ៕
ប្រភព Xinhua ចុះផ្សាយថ្ងៃទី០១ ខែធ្នូ ឆ្នាំ២០២៤
