រដ្ឋខាទុំ៖ យ៉ាងហោចណាស់ជនស៊ីវិល៤៥នាក់ត្រូវបានសម្លាប់ និង៨២នាក់រងរបួសក្នុងការវាយប្រហារដោយទាហានប៉ារ៉ារបស់កងទ័ពគាំទ្ររហ័សហៅកាត់ថា (RSF) នៅថ្ងៃសោរ៍ ទៅលើផ្សារដ៏អ៊ូអរមួយកន្លែងនៅក្នុងអ៊ុំដូម៉េន ដែលជាទីក្រុងភាគខាងជើងរបស់រដ្ឋខាទុំ នេះបើតាមសម្តីរបស់ក្រុមអ្នកស្ម័គ្រចិត្ត និងមន្ទីពេទ្យ។
គណៈកម្មាធិការក្រុមអ្នកតស៊ូ អាល ថាវរ៉ា ដែលជាក្រុមអ្នកស្ម័គ្រចិត្ត បាននិយាយក្នុងសេចក្តីថ្លែងការណ៍ថា “ថ្ងៃនេះ កងជីវពល RSF បានសម្លាប់រង្គាលថ្មីមួយ (នៅថ្ងៃសៅរ៍) ដោយការបំផ្ទុះគ្រាប់បែកនៅផ្សារសាប្រីន សង្កាត់ការ៉ារ៉ី” ។
“មកដល់ពេលនេះ ជនស៊ីវិល៤៥នាក់ត្រូវបានសម្លាប់ និង៨២នាក់រងរបួស” នេះបើតាមខ្លឹមសារបន្ថែមក្នុងសេចក្តីថ្លែងការណ៍ដែលមិនផ្តល់ព័ត៌មានលម្អិត។
ជាមួយគ្នានេះផងដែរ ប្រភពពីមន្ទីពេទ្យ អាល ណាវ ក្នុងទីក្រុងអ៊ុំដូរម៉េន បាននិយាយថា “មន្ទីពេទ្យទទួលបានសាកសពច្រើនជាង២៤សព និងអ្នករបួសជាច្រើននាក់ផ្សេងទៀត”។
ប្រភពបានប្រាប់អ្នកយកព័ត៌មានថា “ស្ថានភាពនេះគឺជាមហន្តរាយដែលអាចកើតឡើងតាមគ្រប់របៀប។ យើងត្រូវការជំនួយឈាម និងសម្ភារៈពេទ្យជាច្រើន”។
ក្នុងពេលជាមួយគ្នានេះផងដែរ អ្នកសារព័ត៌មានប្រចាំទីក្រុងអ៊ុំដូម៉េនបានរាយការណ៍ថា ការវាយប្រហារមានគោលដៅលើផ្សារសាប្រីន ដែលជាផ្សារធំមួយក្នុងតំបន់ដែលប្រជាជននៅទីក្រុងការ៉ារ៉ីតែងតែទៅជាប្រចាំ។
លោកបាននិយាយថា ការបាញ់គ្រាប់ផ្លោងក្នុងពេលដំណាលគ្នាសំដៅលើតំបន់លំនៅដ្ឋានក្បែរផ្សារ ដែលគេរំពឹងថាចំនួនអ្នកស្លាប់អាចនឹងលើសពីតួលេខដែលបានរាយការណ៍។
ពុំទាន់មានសេក្តីថ្លែងការណ៍ផ្លូវការណ៍ណាមួយចេញផ្សាយនៅឡើយទេ ហើយ RSF ក៏មិនទាន់ធ្វើសេចក្តីអត្ថាធិប្បាយជុំវិញនឹងឧបទ្ទវហេតុនេះផងដែរ។
SAF ជាញឹកញាប់បានចោទប្រកាន់ RSF ពីការបំផ្ទុះគ្រាប់បែកនៅក្នុងទីក្រុងការ៉ារ៉ី ចេញពីទីតាំងរបស់ពួកគេនៅបាហរ៉ី ដែលជាទីក្រុងមួយរបស់រដ្ឋខាទុំ។
ការ៉ារ៉ី គឺជាតំបន់តែមួយគត់នៅក្នុងទីក្រុងអ៊ុំដូម៉េនដែលនៅមានចំនួនប្រជាជនច្រើន ហើយស្ថិតក្រោមការគ្រប់គ្រងរបស់កងទ័ព។
ការប្រឈមមុខយោធារវាង SAF និង RSF កាន់តែខ្លាំងឡើងនៅក្នុងរដ្ឋខាទុំនាពេលថ្មីៗនេះ។
SAF បានបន្តពង្រីកខ្លួនគួរឱ្យកត់សម្គាល់ក្នុងរដ្ឋខាទុំ ដោយបានកាន់កាប់ទីតាំងរបស់ពួកគេឡើងវិញនៅតាមក្រវ៉ាត់ក្រុងប៉ាហរ៉ី និងបានរំដោះតំបន់មួយចំនួនទៀត ប៉ុន្តែទីក្រុងក្នុងតំបន់នីលខាងកើតនៅតែជាមូលដ្ឋានសំខាន់របស់ RSF ដដែល។
កងកម្លាំងប្រដាប់អាវុធស៊ូដង់ក៏កំពុងធ្វើប្រតិបត្តិការតាមផ្លូវគោកដើម្បីបញ្ចប់ការគ្រប់គ្រងរបស់ទាហានប៉ារ៉ានៃកងទ័ពគាំទ្ររហ័ស លើតំបន់អុំបាដាខាងលិចរបស់ទីក្រុងអ៊ុំដូរម៉េន ចំណែកឯទាហានប៉ារ៉ានៃកងទ័ពគាំទ្ររហ័សបន្តគ្រប់គ្រងភាគខាងត្បូងរបស់រដ្ឋខាទុំ។
ប្រទេសស៊ូដង់បានជាប់គាំងដោយជម្លោះដ៏ខ្លាំងក្លារវាង SAF និង RSF ចាប់តាំងពីពាក់កណ្តាលខែមេសា ឆ្នាំ២០២៣ ដែលបានសម្លាប់មនុស្សយ៉ាងហោចណាស់ ២៩.៦៨៣នាក់ និងប្រមាណជា១៥លាននាក់ផ្លាស់ទីលំនៅទាំងនៅក្នុងនិងទៅក្រៅប្រទេសស៊ូដង់ នេះបើយោងតាមការប៉ាន់ប្រមាណចុងក្រោយរបស់អង្គការអន្តរជាតិ៕
