ប្រទេសប៉ាគីស្ថាន៖ យោធាប៉ាគីស្ថានបានប្រកាសកាលពីយប់ថ្ងៃព្រហ្បតិ៍ថា កម្លាំងសន្តិសុខបានសម្លាប់ក្រុមភេរវករ១០នាក់ ក្នុងពេលប្រតិបត្តិការដោយផ្អែកលើរបាយការណ៍ស៊ើបអង្កេតក្នុងស្រុកដេរ៉ាអ៊ីស្មែលខាន់ នៅខេត្តខាយប័រ ផាកថុនវ៉ា ភាគពាយ័ព្យប្រទេសប៉ាគីស្ថាន។
អង្គភាពទំនាក់ទំនងសាធារណៈអន្តរសេវា (ISPR) ដែលជាអង្គភាពប្រព័ន្ធផ្សព្វផ្សាយរបស់កងទ័ពប៉ាគីស្ថានបានលើកឡើងនៅក្នុងសេចក្តីថ្លែងការណ៍ថា ប្រតិបត្តិការមួយត្រូវបានធ្វើឡើងតាមរបាយការណ៍ស៊ើបអង្កេតទាក់ទងនឹងវត្តមានក្រុមភេរវករក្នុងតំបន់។
ISPR បានបន្ថែមថា កម្លាំងសន្តិសុខដែលបានឡោមព័ទ្ធទីតាំងលាក់ខ្លួន និងបានបាញ់ប្រហារគ្នាជាមួយពួកសកម្មប្រយុទ្ធ ដែលទទួលបានលទ្ធផលក្នុងការសម្លាប់ពួកគេទាំងនោះ។
សេចក្តីថ្លែងការណ៍បន្ថែមថា ក្នុងពេលបាញ់ប្រហារគ្នាទៅវិញទៅមក នាយទាហានប៉ាគីស្ថានម្នាក់គឺលោកអនុសេនីយ៍ឯក ហាសនៀន អាកថារ ដែលបានដឹកនាំទ័ពនៅជួរមុខបានស្លាប់បាត់បង់ជីវិតបន្ទាប់ពីមានការប្រយុទ្ធគ្នាយ៉ាងសាហាវ។
យោធាក៏បានរឹបអូសអាវុធ និងគ្រាប់រំសេវពីពួកភេរវករដែលស្លាប់ទាំងនោះ ដែលពួកគេទាំងនេះបានចូលរួមយ៉ាងសកម្មក្នុងសកម្មភាពភេរវកម្មប្រឆាំងនឹងភ្នាក់ងារអនុវត្តច្បាប់ និងប្រជាពលរដ្ឋស្លូតត្រង់។
ISPR បានបញ្ជាក់ម្តងទៀតថា កងកម្លាំងសន្តិសុខប៉ាគីស្ថាននៅតែប្តេជ្ញាចិត្តក្នុងការលុបបំបាត់អំពើភេរវកម្មចេញពីប្រទេស ដោយបានបញ្ជាក់ថាការលះបង់បែបនេះធ្វើឱ្យការតាំងចិត្តរបស់ពួកគេកាន់តែរឹងមាំ៕
