ស្លាប់ទាហានម្នាក់ ភេរវករ៥នាក់ក្នុងប្រតិបត្តិការរបស់កងកម្លាំងសន្តិសុខនៅប៉ាគីស្ថាន

ប្រទេសប៉ាគីស្ថាន៖  ទាហានម្នាក់ និងភេរវករ៥នាក់ស្លាប់​ក្នុងពេលប៉ះទង្គិចគ្នារវាងកងកម្លាំងសន្តិសុខ និងភេរវករនៅខេត្តខាយប័រ ផាកថុនវ៉ា ភាគពាយ័ព្យប្រទេសប៉ាគីស្ថាន។

អង្គភាពទំនាក់ទំនងសាធារណៈអន្តរសេវា (ISPR) ដែលជាស្ថាប័នផ្សព្វផ្សាយព័ត៌មានរបស់យោធាប៉ាគីស្ថានបាននិយាយក្នុងសេចក្តីថ្លែងការណ៍កាលពីថ្ងៃចន្ទថា កងកម្លាំងសន្តិសុខបានធ្វើប្រតិបត្តិការដែលមានមូលដ្ឋានលើការស៊ើបអង្កេតនៅក្នុងស្រុកបាជួរ តាមរបាយការណ៍អំពីវត្តមានរបស់ក្រុមភេរវករ។

ISPR និយាយថា កងកម្លាំងសន្តិសុខបានប្រយុទ្ធយ៉ាងមានប្រសិទ្ធិភាពជាមួយពួកភេរវករនៅទីតាំងរបស់ពួកគេ​ ដែលជាលទ្ធផលបានសម្លាប់ភេរវករ៥នាក់។ ISPR បន្ថែមថា ក្នុងអំឡុងប្រតិបត្តិការ មន្ត្រីកងទ័ពម្នាក់​បានស្លាប់បាត់បង់ជីវិតក្នុងពេលបាញ់ប្រហារគ្នាយ៉ាងខ្លាំងក្លា។ ​

ភេរវករដែលស្លាប់ទាំងនេះនៅតែចូលរួមយ៉ាងសកម្មក្នុងសកម្មភាពភេរវកម្មប្រឆាំងនឹងកងកម្លាំងសន្តិសុខ និងជនស៊ីវិលស្លូតត្រង់ នេះបើតាមសេចក្តីថ្លែងការណ៍។ ប្រតិបត្តិការបោសសម្អាតកំពុងត្រូវបានអនុវត្តនៅក្នុងតំបន់នេះដើម្បីលុបបំបាត់ឲ្យអស់នូវវត្តមានរបស់ភេរវករ៕