ប្រទេសអ៊ីរ៉ាក់៖ អ៊ីរ៉ាក់បានទទួលអ្នកទោសដែលជាពួកសកម្មប្រយុទ្ធរដ្ឋអ៊ីស្លាម (IS) ចំនួន១៥០ នាក់លើកដំបូង ដែលពីមុនត្រូវបានឃុំខ្លួននៅក្នុងពន្ធនាគារប្រទេសស៊ីរី នេះបើតាមអាជ្ញាធរអ៊ីរ៉ាក់ប្រកាសកាលពីថ្ងៃពុធ។
អ្នកទោសដែលគេស្គាល់ថាជាជនជាតិអ៊ីរ៉ាក់ និងជាជនបរទេសដែលជាប់ពាក់ព័ន្ធយ៉ាងជ្រៅក្នុងការសម្លាប់ជនស៊ីវិលអ៊ីរ៉ាក់ទាំងនោះ ត្រូវបានឃុំខ្លួននៅក្នុងពន្ធនាគារក្រោមការគ្រប់គ្រងរបស់កងកម្លាំងប្រជាធិបតេយ្យស៊ីរី នេះបើយោងតាមសេចក្តីថ្លែងការណ៍របស់លោក សាបាហ អាល់ណូម៉េន អ្នកនាំពាក្យអគ្គបញ្ជាការកងកម្លាំងអ៊ីរ៉ាក់។
ពួកគេត្រូវបានប្រគល់ខ្លួនក្រោមកិច្ចសម្របសម្រួលជាមួយកងកម្លាំងសម្ព័ន្ធមិត្តអន្តរជាតិដែលមានបេសកកម្មប្រយុទ្ធប្រឆាំងនឹងក្រុមសកម្មប្រយុទ្ធរដ្ឋឥស្លាម IS ហើយនឹងត្រូវបានផ្ទេរទៅ ស្ថាប័នកែប្រែរដ្ឋផ្លូវការ នេះបើតាមសេចក្តីថ្លែងការណ៍។ ចំនួនអ្នកទោស និងពេលវេលានៃការផ្ទេរបន្ថែមទៀតនឹងអាស្រ័យលើការវាយតម្លៃសន្តិសុខដែលកំពុងបន្ត។
យោងតាមកងកម្លាំងបញ្ជាការកណ្តាលរបស់សហរដ្ឋអាមេរិក (CENTCOM) អ្នកទោសទាំងនោះត្រូវបានផ្លាស់ប្តូរពីមន្ទីឃុំឃាំងហាសាកា ប្រទេសស៊ីរី ទៅកាន់ទីតាំងសុវត្ថិភាពមួយនៅក្នុងប្រទេសអ៊ីរ៉ាក់។ ការផ្ទេរនេះគឺជាផ្នែកមួយនៃផែនការដ៏ធំដែលនៅទីបំផុតអាចឃើញអ្នកទោស IS រហូតដល់ទៅ៧.០០០នាក់ ដែលត្រូវបានផ្លាស់ទីទៅកាន់មណ្ឌលកែប្រែដែលគ្រប់គ្រងដោយអ៊ីរ៉ាក់។
CENTCOM និយាយនៅក្នុងសេចក្តីថ្លែងការណ៍ថា ការសម្រួលដល់ការផ្ទេរដែលមានសណ្តាប់ធ្នាប់ និងមានសុវត្ថិភាពគឺមានសារៈសំខាន់ណាស់ក្នុងការទប់ស្កាត់ការរត់គេចខ្លួនដែលនឹងអាចបង្កការគំរាមកំហែងដោយផ្ទាល់ដល់សហរដ្ឋអាមេរិក និងសន្តិសុខក្នុងតំបន់៕
