ប្រទេសកាមេរូន៖ ពួកសកម្មប្រយុទ្ធរបស់ក្រុមបូកូហារាំដែលជាក្រុមភេរវកម្មបានវាយឆ្មក់លើសហគមន៍ចំនួន៤នៅក្នុងតំបន់ហ្វាណ័សរបស់ប្រទេសកាមេរូនកាលពីយប់ថ្ងៃសុក្រ សម្លាប់មនុស្ស២នាក់ និងចាប់ពង្រត់មនុស្ស១៩នាក់ផ្សេងទៀត នេះបើតាមប្រភពពីសន្តិសុខនិយាយកាលពីថ្ងៃសៅរ៍។
មន្ត្រីសន្តិសុខក្នុងតំបន់បានប្រាប់អ្នកយកព័ត៌មានក្នុងលក្ខខណ្ឌអនាមិកថា អ្នកវាយប្រហារបានឆ្មក់ចូលភូមិមួយចំនួនក្នុងស្រុកប្លង់ហ្កា ក្នុងពេលដែលអ្នកភូមិកំពុងគេងលក់ ហើយពួកគេបើកការបាញ់ប្រហារដោយមិនរើសមុខ។
មន្ត្រីនេះបានបន្តថា ”ពួកភេរវករវាយប្រហារលើអ្នកភូមិដោយប្រើកាំភ្លើង ផ្គាក់ កូនកាំបិត និងដំបង” ។ អ្នកភូមិដែលព្យាយាមរត់គេចខ្លួន ពេលដែលចាប់ខ្លួនបាននឹងត្រូវសម្លាប់នៅនឹងកន្លែង។
ស្ត្រីនិងកុមារជាច្រើននាក់ស្ថិតនៅក្នុងចំណោមអ្នកដែលត្រូវបានចាប់ពង្រត់។ ប្រភពបានកត់សម្គាល់ថា កងទ័ពបានបើកប្រតិបត្តិការឆែកឆេររុរក និងជួយសង្គ្រោះ។
គួររំលឹកផងដែរថា ក្រុមបូកូហារាំធ្វើសកម្មភាពយ៉ាងសកម្មនៅក្នុងតំបន់នេះចាប់តាំងពីឆ្នាំ២០១៤ ហើយល្បីល្បាញខាងធ្វើទុក្ខបុកម្នេញលើជនស៊ីវិល ដែលជារឿយៗតែងតែចាប់ជំរិតជនរងគ្រោះដើម្បីជម្រិតទារប្រាក់៕
