ប្រទេសអ៊ីរ៉ង់៖ កងទ័ពឆ្មាំបដិវត្តន៍ឥស្លាមរបស់អ៊ីរ៉ង់បានឲ្យដឹងកាលពីថ្ងៃអាទិត្យ ទី០៧ ខែមិថុនា ថា កងកម្លាំងជើងគោករបស់ខ្លួនបានសម្លាប់សមាជិក ៤នាក់នៃក្រុម“ភេរវករ” ដែលព្យាយាមចូលប្រទេសតាមព្រំដែនភាគអាគ្នេយ៍នៅក្នុងខេត្តស៊ីសស្ថាន និងខេត្តប៉ាឡូជីស្ថាន។
នៅក្នុងសេចក្តីថ្លែងការណ៏មួយដែលចេញជាផ្លូវការ លើបណ្តាញសារព័ត៌មាន សេផាស ញូវស៍ កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានបញ្ជាក់ថា កងម្លាំងចារកម្មប្រចាំខេត្តបានសហការគ្នាក្នុងប្រតិបត្តិការដើម្បីកំទេចក្រុម “ភេរវករ” នេះផងដែរ ដែលប្រតិបត្តិការនេះបានធ្វើឡើងនៅខេត្តសារ៉ាវ៉ាន់កាលពីព្រឹកថ្ងៃអាទិត្យ។
ក្នុងសេចក្តីថ្លែងការណ៍មានខ្លឹមសារបន្ថែមថា កម្លាំងសន្តិសុខម្នាក់ត្រូវបានសម្លាប់ក្នុងប្រតិបត្តិការ និងកងកម្លាំងជើងគោករបស់ខ្លួនបានរឹបអូសអាវុធ គ្រាប់រំសេវ និងសម្ភារៈមួយចំនួន ក្នុងចំណោមសម្ភារៈផ្សេងៗទៀតពី “ក្រុមភេរវករ”។
យោងតាមសេចក្តីថ្លែងការណ៍បានឲ្យដឹងថា វិធានការស៊ើបការណ៍ និងប្រតិបត្តិការគឺកំពុងដំណើរការដើម្បីកំណត់ និងចាប់ខ្លួនសមាជិកក្រុម “ភេរវករ” ដែលមានសក្តានុពលផ្សេងទៀត។
គួរំលឹកផងដែរថា ខេត្តស៊ីសស្ថាន និងខេត្តប៉ាឡូជីស្ថានជាខេត្តស្ថិតនៅជាប់ព្រំដែនប៉ាគីស្ថាន និងអាហ្វហ្កានីស្ថាន ត្រូវបានគេមើលឃើញថាមានការប៉ះទង្គិចគ្នាជាបន្តបន្ទាប់រវាងកងកម្លាំង
សន្តិសុខអ៊ីរ៉ង់ ក្រុមសកម្មប្រយុទ្ធ និងក្រុមអ្នកជួញដូរគ្រឿងញៀន៕
ប្រភព Xinhua ចុះផ្សាយឡើងវិញថ្ងៃទី០៨ ខែមិថុនា ឆ្នាំ២០២៦
