ប្រទេសអ៊ីស្រាអែល៖ កងទ័ពការពារជាតិអ៊ីស្រាអែល (IDF) និងប្រព័ន្ធផ្សព្វផ្សាយអ៊ីស្រាអែលបានរាយការណ៍កាលពីថ្ងៃព្រហស្បតិ៍ ទី១៨ ថា ទាហានអ៊ីស្រាអែលបានម្នាក់ស្លាប់ និង៧នាក់ផ្សេងទៀតបានរងរបួសកាលពីល្ងាចថ្ងៃពុធ ទី១៧ ខែមិថុនា បន្ទាប់ពីគ្រាប់បែកកែច្នៃ (IED) ដែលដាក់ដោយក្រុមហេបូឡា បានផ្ទុះនៅប៉ុស្តិ៍បញ្ជាការយោធាអ៊ីស្រាអែល ក្នុងភូមិថាយបេហ ភាគខាងត្បូងប្រទេសលីបង់។
ទាហានដែលបានស្លាប់ត្រូវបានកំណត់អត្តសញ្ញាណបានថាជាអនុសេនីយ៍ទោជាន់ខ្ពស់ អេឡិចហ្សេនដឺរ ហ្វីលីន ដែលជាទាហានផ្នែករថពាសដែកមានអាយុ ២៩ឆ្នាំ។ ក្នុងចំណោមអ្នករងគ្រោះទាំង ៧នាក់ មាន ៣នាក់ រួមទាំងវរសេនីយ៍ឯកម្នាក់ផង ស្ថិតក្នុងស្ថានភាពមធ្យម ខណៈ ៤នាក់ទៀតរងរបួសស្រាល។
យោងតាមសេចក្តីរាយការណ៍របស់ប្រព័ន្ធផ្សព្វផ្សាយអ៊ីស្រាអែល ការស៊ើបអង្កេតជំហានដំបូងរបស់ IDF បានបង្ហាញថា ការផ្ទុះនេះបណ្ដាលមកពីគ្រឿងផ្ទុះកែច្នៃដែលដាក់ដោយក្រុមហេបូឡា ប៉ុន្តែព័ត៌មានលម្អិតបន្ថែមគឺស្ថិតនៅក្រោមការស៊ើបអង្កេតបន្ត។
បន្ទាប់ពីមានហេតុការណ៍នេះ IDF បានឲ្យដឹងថា ពួកគេបានបាញ់ប្រហារដោយកាំភ្លើងធំទៅលើរចនាសម្ព័ន្ធហេបូឡានៅក្នុងតំបន់នោះ។
ភ្នាក់ងារសារព័ត៌មានជាតិលីបង់បានរាយការណ៍កាលពីថ្ងៃព្រហស្បតិ៍ ទី១៨ ខែមិថុនា ថា មនុស្សម្នាក់ត្រូវបានសម្លាប់ និងម្នាក់ផ្សេងទៀតរងរបួសធ្ងន់ក្នុងការវាយប្រហារដោយយន្ដហោះដ្រូនរបស់អ៊ីស្រាអែលទៅលើរថយន្តមួយគ្រឿងនៅភាគខាងត្បូងប្រទេសលីបង់។
ការវាយប្រហារនោះបានវាយចំរថយន្តមួយគ្រឿងនៅក្បែររង្វង់មូលដែលបានតភ្ជាប់ទីក្រុងឃេហ្វារ ថេបនីត និងក្រុងអារណោន នៅក្នុងតំបន់រដ្ឋាភិបាលណាបាទៀហ។
ជម្លោះទាំងនេះបានកើតឡើង បើទោះបីជាមានកិច្ចព្រមព្រៀងថ្មីមួយរវាងសហរដ្ឋអាមេរិក និងអ៊ីរ៉ង់ ដែលមានគោលបំណងបញ្ឈប់ប្រតិបត្តិការយោធានៅទូទាំងតំបន់ និងគាំទ្រកិច្ចខិតខំប្រឹងប្រែងដើម្បីស្តារស្ថេរភាពឡើងវិញនៅលីបង់ក៏ដោយ៕
ប្រភព Xinhua ចុះផ្សាយឡើងវិញថ្ងៃទី១៩ ខែមិថុនា ឆ្នាំ២០២៦
