សហរដ្ឋអាមេរិក៖ សហរដ្ឋអាមេរិកកាលពីថ្ងៃទី២៤ ខែសីហា បានដកប្រទេសស៊ីរីចេញពីបញ្ចីប្រទេសដែលគាំទ្រអំពើភេរវកម្មរបស់ខ្លួន ដោយបានលុបចោលការកំណត់ឋានៈដែលមានអាយុកាលរាប់ទសវត្សរ៍ ដែលការកំណត់នោះបាននាំមកនូវការរឹតត្បិតសេដ្ឋកិច្ចយ៉ាងធ្ងន់ធ្ងរ។ ការសម្រេចនេះក៏ជាជំហានមួយទៀតដែលបង្ហាញពីការធ្វើឲ្យទំនាក់ទំនងប្រទេសទាំងពីរកាន់តែប្រសើរឡើង។ ក្រសួងការបរទេសសហរដ្ឋអាមេរិកថែមទាំងបានលុបចោលនូវឈ្មោះដែលពួកគេធ្លាប់បានដាក់ពីមុនមកថាជាក្រុមអាលនូស្រាហ្វ្រាន់(Al-Nusrah Front) ដែលក្រោយមកត្រូវបានគេស្គាល់ថា ជាក្រុមហាយ៉ាត ថាហរៀ អាល ស្ហាម (HTS) ដែលជាអង្គការភេរវកម្មសកលផងដែរ។ ក្រសួងរតនាគារអាមេរិកបានប្រកាសពីការបន្ធូរបន្ថយទណ្ឌកម្មដែលពាក់ព័ន្ធនឹងការសម្រេចនេះ។ “សកម្មភាពថ្ងៃនេះនឹងជួយជំរុញដល់ការវិនិយោគបន្ថែមទៀតនៅក្នុងប្រទេសស៊ីរីដើម្បីលើកកម្ពស់ស្ថិរភាពនយោបាយ និងសេដ្ឋកិច្ច” នេះបើតាមប្រសាសន៍របស់លោក ស្កត បេសេន (Scott Bessent) រដ្ឋមន្ត្រីក្រសួងរតនាគារជាតិអាមេរិកថ្លែងនៅក្នុងសេចក្តីថ្លែងការណ៍មួយ។
ក្រសួងរតនាគារអាមេរិកបានឲ្យដឹងថា វិធានការទាំងនេះ គឺស្របតាមការសន្យារបស់ប្រធានាធិបតី ដូណាល ត្រាំ ក្នុងការផ្តល់ការបន្ធូរបន្ថយទណ្ឌកម្មដល់ប្រទេសស៊ីរី។ ប៉ុន្តែភ្នាក់ងារក្រសួងរតនាគារបានលើកឡើងថា ការដកចេញនូវការរឹតបន្តឹងទៅលើប្រទេសស៊ីរី “មិនបានផ្លាស់ប្តូរឥរិយាបថរបស់រតនាគារទាក់ទងនឹងការប្រឆាំងនឹងអំពើភេរវកម្មសកល និងការប្តេជ្ញាចិត្តរបស់យើងក្នុងការរក្សាតួអង្គអាក្រក់នៅក្នុងប្រទេសស៊ីរីឱ្យរួចផុតពីការទទួលខុសត្រូវនោះទេ”។ គួរំលឹកផងដែរថា ក្រុមហាយ៉ាត ថាហរៀ អាល ស្ហាម (HTS) ធ្លាប់ត្រូវបានគេស្គាល់ថាជាក្រុម អាល នូស្រា ហ្រ្វាន់ និងធ្លាប់ជាសាខារបស់ក្រុមអាល កៃដា( Al-Qaeda) នៅក្នុងប្រទេសស៊ីរី។ ប៉ុន្តែក្រុមនេះធ្លាប់មានបញ្ហាបែកបាក់ជាមួយក្រុមសកម្មប្រយុទ្ធកាលពីឆ្នាំ២០១៦ និងបានព្យាយាមធ្វើឱ្យវត្តមានរបស់ពួកគេថយភាពឃោឃៅ៕
ប្រភព straitstimes ចុះផ្សាយថ្ងៃទី២៥ ខែសីហា ឆ្នាំ២០២៥
