ប្រភពព័ត៌មានពី AP ចេញផ្សាយថ្ងៃទី ២០ ខែ មករា ឆ្នាំ ២០១៦
បើយោងតាមក្រុមមន្ត្រីប៉ាគីស្ថានបានឲ្យដឹងថាយ៉ាងហោចណាស់មានមនុស្ស ១៩នាក់បានស្លាប់ និងជាច្រើននាក់រងរបួសក្នុងការវាយប្រហារទៅលើសាកលវិទ្យាល័យមួយក្នុងភាគពាយព្យប្រទេសប៉ាគីស្ថាន ហើយកងកម្លាំងសន្តិសុខកំពុងតែធ្វើការងារដើម្បីធានាឲ្យមានសុវត្ថភាពឡើងវីញជុំវិញបរិវេណសាកលវិទ្យាល័យមួយនេះ។ លោក Tahir Zafar ស្នងការរងបានប្រាប់ AP ពីការវាយប្រហារបានចាប់ផ្តើមក្នុងរយៈពេលខ្លីបន្ទាប់ពីសាកលវិទ្យាល័យមួយនេះបានបើកទ្វារដែលមានទីតាំងនៅក្នុងក្រុង Charsadda, ដែលមានចម្ងាយ ២១ ម៉ាយខាងក្រៅទីក្រុង Peshawar។ ប៉ូលីស និងកងទ័ពបាញ់កាំភ្លើងតបតជាមួយនឹងក្រុមវាយប្រហារនៅក្នុងបរិវេណសាកលវិទ្យាល័យ ដែលជាកន្លែងដែលមានសំលេងផ្ទុះជាច្រើនបានឮចេញពីតំបន់នៃសាកលវិទ្យាល័យ Khan bacha។ កងទ័ពប៉ាគីស្ថានបាននិយាយថា ការវាយប្រហារនេះស្ថិតនៅក្នុងអគារចំនួនពីររបស់សាកលវិទ្យាល័យ ហើយអ្នកវាយប្រហារមានគ្នាចំនួន៤នាក់ដែលពួកគេទាំងនោះត្រូវបានសម្លាប់។ មកទល់ពេលនេះគ្មាននរណាម្នាក់បានអះអាងទទួលខុសត្រូវចំពោះការវាយប្រហារនេះនៅឡើយទេ។ គួរបញ្ជាក់ផងដែរថាការវាយប្រហាររបស់ពួកតាលីបង់ក្នុងសាលារៀនមួយក្នុងទីក្រុង Peshawar នៅក្នុងខែធ្នូឆ្នាំ ២០១៤ បានសម្លាប់មនុស្សជាង ១៥០នាក់ដែលភាគច្រើនជាកុមារ។
