ប្រភពព័ត៌មានពី Reuters ចេញផ្សាយថ្ងៃទី២៧ ខែសីហា ឆ្នាំ២០១៨
ខុទ្ទកាល័យលោកប្រធានាធិបតីអាហ្វហ្គានីស្ថាន Ashraf Ghani មានប្រសាសន៍នៅថ្ងៃចន្ទថា ប្រទេសរុស្ស៊ីពន្យាពេលកិច្ចចរចាសន្តិភាពពហុភាគីជាមួយក្រុមតាលីបង់រយៈពេល១សប្តាហ៍ ក្រោយពីទទួលយកការអញ្ជើញទៅកាន់ទីក្រុងម៉ូស្គូសម្រាប់កិច្ចប្រជុំកំពូលនៅថ្ងៃទី០៤ ខែកញ្ញា។
ប្រទេសរុស្ស៊ីអញ្ជើញប្រទេសចំនួន១២ និងក្រុមតាលីបង់ទៅកាន់ក្រុងម៉ូស្គូសម្រាប់កិច្ចពិភាក្សាសន្តិភាពនៅខែក្រោយ។ ប៉ុន្តែទោះបីជាក្រុមតាលីបង់ទទួលយកការអញ្ជើញនេះ ក៏ទីក្រុងកាប៊ុលលើកហេតុផលថា ការចរចាសន្តិភាពជាមួយក្រុមតាលីបងដាច់ខាតត្រូវតែប្រទេសអាហ្គានីស្ថានជាអ្នកដឹកនាំ។
មន្ត្រីជាន់ខ្ពស់លោក Ghani ប្រាប់ភ្នាក់ងារ Reuters ថា លោកជជែកជាមួយលោករដ្ឋមន្ត្រីការបរទេសរុស្ស៊ី Sergei Lavrov ដោះស្រាយបញ្ហាខុសគ្នា និងធានាកិច្ចចរចាជាមួយពួកតាលីបង់ត្រូវមានវត្តមានចូលរួមរបស់រដ្ឋាភិបាលអាហ្វហ្គានីស្ថាន។
លោក Lavrov ធានាដល់លោក Ghani ថា កិច្ចប្រជុំកំពូលនេះនឹងត្រូវផ្លាស់ប្តូរដើម្បីធានាឱ្យមានការចូលរួមពីប្រទេសអាហ្វហ្គានីស្ថាន។ លោក Ghani មានប្រសាសន៍ក្នុងសេចក្តីថ្លែងការណ៍មួយថា ការសម្រេចចិត្តពន្យារពេលសម្រាប់កិច្ចប្រជុំនៅទីក្រុងម៉ូស្គូគឺដើម្បីធ្វើការរៀបចំ និងឱ្យមានប្រសិទ្ធិភាពជាងមុនដើម្បីអាចឱ្យរដ្ឋាភិបាលអាហ្វហ្គានីស្ថាន និងរុស្ស៊ីរួបរួមគ្នា និងចូលរួមក្នុងកិច្ចប្រជុំនេះ។ សហរដ្ឋអាមេរិកក៏បដិសេធមិនចូលរួមក្នុងព្រឹត្តិការណ៍នៅថ្ងៃទី០៤ ខែកញ្ញា។
