អ៊ីរ៉ង់បានប្រហារជីវិតអតីតបុគ្គលិកក្រសួងការពារជាតិម្នាក់ដែលបានលក់ព័ត៌មានទៅទីភ្នាក់ងារស៊ើបការណ៍សម្ងាត់កណ្តាលអាមេរិក (CIA) នេះបើតាមយោងតាមតុលាការអ៊ីរ៉ង់បាននិយាយកាលពីថ្ងៃអង្គារនេះ។
អ្នកនាំពាក្យតុលាការលោក Gholamhossein Esmaili បាននិយាយថាលោក Reza Asgari មានទំនាក់ទំនងជាមួយសេអ៊ីអាក្នុងអំឡុងពេលប៉ុន្មានឆ្នាំចុងក្រោយក្នុងពេលបម្រើការរបស់គាត់នៅក្រសួងការពារជាតិ និងបានលក់ព័ត៌មានអំពីកម្មវិធីមីស៊ីលរបស់អ៊ីរ៉ង់។ លោកAsgariបានចូលនិវត្តន៍ពីក្រសួងកាលពីបួនឆ្នាំមុន និងបានកាត់ទោសប្រហារជីវិតកាលពីសប្តាហ៍មុន។
ដោយឡែកលោក Esmaili ក៏បាននិយាយថាក៏មានការកាត់ទោសប្រហារជីវិតផងដែរលើជនជាតិអ៊ីរ៉ងម្នាក់ទៀតគឺលោក Mahmoud Mousavi-Majd ដែលត្រូវបានចោទប្រកាន់ពីបទធ្វើចារកម្មស៊ើបការណ៍សម្ងាត់អោយសហរដ្ឋអាមេរិក និងអ៊ីស្រាអែល។ គួររំលឹកថាកាលពីឆ្នាំមុនអ៊ីរ៉ង់បានប្រកាសថាខ្លួនបានចាប់បានអ្នកស៊ើបការណ៍ចំនួន១៧នាក់ដែលខ្លួនបាននិយាយថាកំពុងធ្វើការអោយ CIA ៕
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ១៤ ខែកក្តដា ឆ្នាំ២០២០