សណ្ឋាគារភ្នំពេញ៖ សិក្ខាសាលាស្តីពីការផ្លាស់ប្តូរព័ត៌មាន និងការសម្របសម្រួលដែលសហការរៀបចំដោយ ទីភ្នាក់ងារថាមពលអាតូមិកអន្តរជាតិ និងក្រសួងឧស្សាហកម្ម រ៉ែ និងថាមពល បានប្រព្រឹត្តិទៅក្នុងរយៈពេល ០៣ ថ្ងៃ គឺពីថ្ងៃទី ២៦ ដល់ ថ្ងៃទី ២៨ ខែវិច្ឆិកា ឆ្នាំ២០១៣ ដែលមានប្រទេសជាសមាជិកអាស៊ានចំនួន ០៩ និងប្រទេសញូសៀឡែន បានចូលរួម ក្រោមកិច្ច សម្របសម្រួលកម្មវិធី និងឧបត្ថម្ភថវិការដោយទីភ្នាក់ងារថាមពលអាតូមិកអន្តរជាតិ ។
សិក្ខាសាលានេះបានផ្តោតលើការចែករំលែកបទពិសោធន៍នៃគម្រោងសន្តិសុខកំពង់ផែ ការវិវត្តន៍នូវច្បាប់ក្នុងស្រុកនិងលិខិតុបករណ៍ជាលក្ខណៈអន្តរជាតិដែលបណ្តារប្រទេសជាសមាជិកអាស៊ានបានចូលរួម ហើយក៏មានការធ្វើបទបង្ហាញពីបណ្តារប្រទេសនានាដែលចូលរួមដូចជា កម្ពុជា ឥណ្ឌូនេស៊ី ម៉ាឡេស៊ី ឡាវ ភូមា សឹង្ហបូរី ហ្វីលីពីន ថៃ និង វៀតណាម ។ ក្រៅពីនេះតំណាងរបស់ទីភ្នាក់ងារថាមពលអាតូមិកអន្តរជាតិ ក៏បានធ្វើបទបង្ហាញមួយចំនួនដែលពាក់ព័ន្ធផងដែរ ជាពិសេសការផ្តោតសំខាន់លើខ្លឹមសារនៃការចូលរួមជាសមាជិកនៃប្រទេសដែលមិនទាន់បានចូលរួមក្នុងទិន្នន័យ ITDB របស់ទីភ្នាក់ងារថាមពលអាតូមិកអន្តរជាតិ។
ឯកឧត្តម អ៊ឹង អៀង ជាតំណាងដ៏ខ្ពង់ខ្ពស់របស់ឯកឧត្តមទេសរដ្ឋមន្រ្តី ឱម យ៉ិនទៀង ក្នុងនាមលេខាធិការដ្ឋានគណៈកម្មាធិការជាតិប្រឆាំងភេរវកម្ម បានត្រូវទីភ្នាក់ងារថាមពលអាតូមិកអន្តរជាតិអញ្ជើញឱ្យធ្វើបទបង្ហាញលើជោគជ័យនៃការសម្របសម្រួលលើការងារបំពាក់ឧបករណ៍រាវរកសារធាតុវិទ្យុសកម្មនៅកម្ពុជា។ ក្នុងពេលធ្វើបទបង្ហាញ បណ្តារប្រទេសដែលបានចូលរួមបានពេញចិត្តចំពោះតួនាទីរបស់លេខាធិការដ្ឋានគណៈកម្មាធិការជាតិប្រឆាំងភេរវកម្មនៅកម្ពុជាដែលបានបំពេញការងារនេះសម្របសម្រួលនេះបានល្អដែលបណ្តារប្រទេសមួយចំនួននៅក្នុងតំបន់កំពុងប្រឈមនឹងការទទួលខុសត្រូវ និងការបែងចែកភារកិច្ចទទួលបន្ទុកលើការងាររបស់ស្ថាប័នពាក់ព័ន្ធលើគម្រោងនេះ។
