លេខាធិការដ្ឋាន គ.ជ.ប.ភ – ភ្នំពេញ៖ ក្រោយពីបានដំណើរការសិក្សា និងអនុវត្តន៍ជាក់ស្តែងរយៈពេល ០៥ថ្ងៃកន្លងមក (ពីថ្ងៃទី២២-២៦ ខែកញ្ញា ឆ្នាំ២០១៤) វគ្គហ្វឹកហ្វឺនស្តីពីការឆ្លើយតបនឹងសារធាតុ CBRN សំរាប់អ្នកឆ្លើយតបបឋម (គំរោងលេខ២២ របស់សហគមន៍អ៊ឺរ៉ុប) នៅលេខាធិការដ្ឋាន គ.ជ.ប.ភ បានបញ្ចប់នាព្រឹកថ្ងៃទី២៦ ខែកញ្ញា ឆ្នាំ២០១៤ ក្រោមអធិបតីភាព ឯកឧត្តម អ៊ឹង អៀង សមាជិកលេខាធិការដ្ឋាន គ.ជ.ប.ភ និងជាតំណាងដ៏ខ្ពង់ខ្ពស់របស់ ឯកឧត្តម ទេសរដ្ឋមន្រ្តី ឱម យ៉ិនទៀង អនុប្រធានលេខាធិការដ្ឋាន គ.ជ.ប.ភ ។
ក្នុងពិធីបិទនេះ គ្រូឧទ្ទេសនាមទាំង ៣ រូប បានសម្តែងនូវការកោតសរសើរចំពោះការចូលរួមយ៉ាងសកម្មរបស់សិក្ខាកាមកម្ពុជា (ដែលជាមន្រ្តីជំនាញ មកពីក្រសួងមហាផ្ទៃ (នាយកដ្ឋានពន្លត់អគ្គីភ័យ និងគ្រប់គ្រងអាវុធជាតិផ្ទុះ) ក្រសួងការពារជាតិ (ក្រុមការងារថ្នាក់ជាតិ CBRN) ក្រសួងសុខាភិបាល (នាយកដ្ឋានមន្ទីរពេទ្យ និង CDC) ក្រុម CBRE របស់បញ្ជាការដ្ឋានជាតិកម្លាំងពិសេសប្រឆាំងភេរវកម្ម និងមន្រ្តីរបស់លេខាធិការដ្ឋាន គ.ជ.ប.ភ)ទាំងការសួរសំណួរក្នុងថ្នាក់ និងការអនុវត្តន៍លើសម្ភារៈជាក់ស្តែងនៅទីវាល។
គួរបញ្ជាក់ថា វគ្គហ្វឹកហ្វឺនដែលមានរយៈពេល ០៥ថ្ងៃកន្លងមកនេះ សិក្ខាកាមបានសិក្សាលើទ្រឹស្តីនិងបានអនុវត្តន៍ជាក់ស្តែងលើឧបករណ៍លាងសំអាតការប្រឡាក់សារធាតុគីមី និងការប្រើប្រាស់អាវការពារមួយចំនួន ដែលសហគមន៍អ៊ឺរ៉ុបបាននាំមកជាមួយសំរាប់ហ្វឹកហាត់ដល់សិក្ខាកាម ក៏ដូចជាការអនុវត្តន៍លំហាត់លើការងារជួយសង្គ្រោះពេលមានឧបទ្ទវហេតុចំនួន ០៤ លើកផងដែរ ។ ការហ្វឹកហ្វឺននេះជាផ្នែកមួយនៃគំរោងលេខ ២២ របស់សហគមន៍អ៊ឺរ៉ុបដែលផ្តល់មកដល់តំបន់អាស៊ីអាគ្នេយ៍ ហើយក្រោយការបញ្ចប់ការហ្វឹកហ្វឺននៅកម្ពុជា ក៏នឹងមានការផ្តល់ការហ្វឹកហ្វឺនដូចគ្នានេះនៅប្រទេសឡាវ ហ្វីលីពីន ជាបន្តទៀតផងដែរ ។
